Kansi Baibolo yunena kuti tyani pa nkhani yosamalila makolo okalamba?

IMBANI

Yankho, ya m’Baibolo

Ŵana akakula onkhala na udindo wosamalila makolo ŵawo achikulile. Baibolo yunena kuti ŵana amene awo ofunika “kuphunzila kunkhala olipeleka kwa Mulungu m’Banja mwawo choyamba, mwakufwanila makolo . . . , voŵayenelela pakuti vamene ivi vukondwelesha Mulungu.” (1 Timoteyo 5:4, New International Version) Tetyo ŵana akoyeja-yeja kusamalila makolo ŵawo achikulile, owonesha kuti omvwila lamulo ya m’Baibolo yakuti akolemekeza makolo ŵawo.—Aefeso 6:2, 3.

Baibolo yupeleka lini malangizo achindunji amufunika kukonkheja posamalila makolo achikulile. Koma yufotokoza mwamene analume na anakazi ayakine mwechitila kuvuli uku posamalila makolo ŵawo. Ndipo ili na mfundo zamene zingayavye ŵanthu amene osamalila makolo achikulile.

Kansi atumiki ayakine akale enzesamalila tyani makolo ŵawo achikulile?

Penze njila zosiyana-siyana zosamalilila makolo achikulile, potolela mwevenzele vinthu.

Yosefe enzenkhala kutali na atata ŵake okalamba, a Yakobo. Vinthu peviyamba kumuyendela luweme, ekonza zakuti atata ŵake awele pafupi na kwenze nkhala yove. Yosefe eŵapasa malo onkhala, chakulwa, komasoti enzeŵateteza.—Genesis 45:9-11; 47:11, 12.
Rute echoka kwawo kuluta kuchalo kwenze apongozi ŵake anakazi-ndipo-enzekata ntchito mwakhama kuti akoŵayavya.—Rute 1:16; 2:2, 17, 18, 23.
Yesu, pechisala patontho kupaiwa, esankhilatu munthu kuti akosamalila amayi ŵake Mariya.—Yohane 19:26, 27. a

Kansi ni malangizo otyani ŵayupeleka Baibolo kuli ŵanthu osamalila makolo achikulile?

Baibolo ili na mfundo zamene zingayavye ŵanthu amene osamalila makolo achikulile kuti akwanishe kusilija mavuto ŵakukumana nawo nthawe ziyakine poŵasamalila .

Mukolemekeza makolo.

Vayunena Baibolo: “Ukolemekeza atata ŵako na amayi ŵako.”—Ekisodo 20:12.

Mwamungakatishilile ntchito mfundo yamene iyi. Mukolemekeza makolo ŵanu poŵalola kuti akwanishe kulisamalila ŵeka mpaka mwangakwaneshile. Keno ni vokwanishika, mukoŵalola kusankha thandizo yangafune. Mungawoneshe soti, kuti muŵalemekeza poŵapasa thandizo yamungakwanishe.
Mukowamvwisha komasoti kuŵakhululukila.

Vayunena Baibolo: “Kuzindikila kuchitisha munthu kujosha ukali ŵake, ndipo kunyala-yaza cholakwa kuchitisha kunkhala wokongola.”—Miyambo 19:11.

Mwamungakatishilile ntchito mfundo yamene iyi. Keno makolo ŵanu achikulile alaŵila mosakuganizilani kapena keno owonesha lini kutembaja vamuŵachitila, likosheni kuti ‘Kansi kuti newo niye wachikulile wamene uyu sembe nachita tyani?’ Keno mumvwisha mwakuchitila achikulile vinthu komasoti mukoŵakhululukila, mukwanishe kupewa mavuto anyinji.
Mukosenga ŵanthu ayakine kuti akuyavyeni.

Vayunena Baibolo: “Volingalila vukwanilishika lini keno ŵanthu okambilana lini mofumila mu ntima, koma olangiza akapaka vukwanilishika.”—Miyambo 15:22.

Mwamungakatishilile ntchito mfundo yamene iyi. Fufuzani vamungachite kuti muyavye makolo ŵanu achikulile keno olwala-lwala. Mungafufuze thandizo yamene ilipo m’dela yanu yamunga ŵathandizile nayo. Mukofufuza nzelu kuli ŵanthu ayakine amene esamalilapo makolo achikulile. Keno muli na achibale, mungakonze zakuti mukambilane za thandizo yakufunikila makolo ŵanu, mwamunga ŵasamalilile komasoti vamungachite monse poyavyana udindo wamene uyu.

Ganizilani zonkhala na msonkhano wa Banja kuti mukambilane mwamunga samalilile makolo okalamba
Mukolichefya.

Vayunena Baibolo: “Nzelu zunkhala na ŵanthu olichefya.”—Miyambo 11:2.

Mwamungakatishilile ntchito mfundo yamene iyi. Mukoziŵa malile ŵanu. Mwachisanzo, aliyense onkhala na malile pokatishila ntchito nthawe komasoti mphamvu. Malile ni ofunika kuti mukwanishe kuziŵa vamungakwanishe poyavya makolo ŵanu. Mukawona kuti mupanikizika na udindo wamene uyu, mukosenga achibale ŵanu kapena ŵanthu ayakine amene osamalila soti achikulile kuti akuyavyeni.
Namwe mukolisamalila.

Vayunena Baibolo: “Paliye munthu ezondapo muŵili wake, koma oulyesha noukonda.”—Aefeso 5:29.

Mwamungakatishilile ntchito mfundo yamene iyi. Olo kuti muli na udindo wosamalila makolo ŵanu, namwe mukolisamalila. Ndipo keno muli pa Banja mukosamalila banja yanu. Mukokulya mokwanila. Mukopeza nthawe yopumula komasoti mukoyona mokwanila. (Mlaliki 4:6) Keno ni vokwanishika osati mukolipanikiza pokata ntchito. Vamene ivi vingakuyavyeni kuti mukosangalala—posamalila makolo ŵanu, komasoti kuti munkhale—na thandizo iweme.

Kansi Baibolo yunena kuti makolo achikulile akosamaliliwa ali kuni?

Baibolo yupeleka lini malangizo achindunji okhuza malo amene ŵana ŵangasamalilileko makolo ŵawo achikulile. Mabanja ayakine osankha kuti akonkhala na makolo ŵawo achikulile. Nthawe ziyakine okwanisha kuŵatwala ku malo osamalilako okalamba. Vikatetyo, achibale angakambilane vangachite aliyense kuti akosamalila makolo achikulile amene aŵo.—Agalatiya 6:4, 5.

a Pa nkhani yamene iyi, buku iyakine yufotokoza za Baibolo yunena kuti: “vuwoneka kuti penze pepita nthawe Yosefe [mwanalume wa Mariya] wa mwalila kale, ndipo Yesu niye enzesamalila Mariya. Koma pakuti Yesu enze esala patontho kumfwa payakine enzedela nkhaŵa akuti azasamalile amayi ŵake amene ŵawo . . . apa khilisitu epeleka chisanzo chiweme kuli ŵana kuti akosamalila makolo ŵawo achikulile.”—The NIV Matthew Henry Commentary in One Volume, pedji 428-429.