Ŵanthu anyinji ofuna kuziŵa mayankho amakonsho okhuza moyo. Okwanisha kukonsha kuti “Ndaŵa yanji tili pano pachalo”? Kapena “Kansi moyo wangu uli na cholinga chili chonse”? Baibolo yuwonesha kuti cholinga cha moyo wasu ni kunkhala paushamwali na Mulungu. Onani mfundo za chendi zokonkhapo zayuphunzisa Baibolo.

•   Mulungu ni nyamalenga wasu. Baibolo yunena kuti: “Yove [Mulungu] niye etipanga, ndipo tiliye lipange seka.”—Salimo 100:3; Chivumbulutso 4:11.

•   Vinthu vonse vechilenga Mulungu, kupamikijapo sewo, ali navo na cholinga.—Yesaya 45:18.

•   Mulungu etilenga munjila yakuti tikokwanisha kuzindikila vinthu vofunika ngako pamoyo wasu vamene vupamikijapo kufuna kuziŵa cholinga cha moyo. (Mateyu 5:3) Yove ofuna kuti tiziŵe cholimga cha moyo wasu.—Salimo 145:16.

•   Tuwonesha kuti tuzindikila vinthu vofunika ngako pamoyo wasu tikoyeja-yeja kunkhala paushamwali na Mulungu. Olo kuti ayakine angawone kuti ni vosakwanishika kuti sewo taŵanthu tinkhale shamwali olo paushamwali na Mulungu, Baibolo yulimbikisa kuti: “mvwendelani kwa Mulungu, ndipo naye akumvwendeleleni.”—Yakobo 4:8; 2:23.

•   Kuti tinkhale paushamwali na Mulungu, tufunika kuchita vinthu vakufuna yove. Baibolo yunena vakufuna Mulungu kuti tikochita palemba ya Mlaliki 12:13: lemba yamene iyi yunena kuti: “yopa Mulungu wachendi, na kusunga malamulo ŵake, chifukwa vamene ivi niye vakufunika kuchita munthu.”—Good News Translation.

•   Kusogolo uku, Mulungu azapeleke moyo wosasila uliye mavuto aliwonse, Kuli ŵanthu amene omulambila komasoti ali naye paushamwali uweme. Mulungu azachite vamene ivi chifukwa ni cholinga chenze nacho poyamba penzelenga ŵanthu.—Salimo 37:10, 11.Linganijani “kutamanishiwa” na w12-CN 1/11 pedji 8 “Ndaŵa yanji Mulungu olola kuti nikovutika?”