Yakobo elimbana na mngelo cifukwa enzofuna cinthu cofunika ngako—kudalisiwa na Yehova. (Gen 32:24-31; Hos 12:3, 4) Nanga tyani seo? Kansi tucita khama pomvwila Yehova kuti atidalise? Mwacisanzo, kansi tucita tyani ngati ni nthawi yakuti tipezeke ku misonkhano koma panthawi imozimozi atisenga kuti tiseŵenze ovataimu ku nchito? Ngati tuseŵenzesha nthawi yasu, mphamvu zasu na cuma casu potumikila Yehova, atikhutulile ‘madaliso akuti ticitosoŵa poŵalondelela.’ (Mal 3:10) Atisogolele na kutiteteza, ndipo atipase zinthu zatufunikila.—Mat 6:33; Aheb 13:5.

ONELELANI VIDYO YA MUTU WAKUTI IKANI MAGANIZO ŴANU PA ZOLINGA ZAUZIMU, NDIPO YANKHANI MAKONSHO AŴA:

• Kansi kalongosi eyesewa tyani na zinthu zenzokonda?

• Kansi nchito yasu ingankhale tyani ciyeso?

• Ndaŵa yanji Timoteyo enzofunika kupitilizhya kuika maganizo ŵake pa zolinga zauzimu olo kuti enze wacikulile mwauzimu?—1 Tim 4:16

• Kansi tuonesha tyani kuti iyi niye nchito yofunika ngako pa umoyo wasu?