Yakobo enzoziŵa kuti Yehova ofuna kuti ŵanthu akolambila tyala yove. Yakobo eziŵa mfundo iyi olo kuti Yehova enze akaliyopeleka lamulo yolesha kulambila mafano. (Eks 20:3-5) Yehova pecimuuzhya kuti awelele ku Beteli, Yakobo euzhya ŵanthu a m’banja mwake kucosa mafano. Ndipo etaya mafano onse, kuyangizhyilapo masikiyo, yamene cuoneka kuti enzoyavwala monga vithumwa. (Gen 35:1-4) N’zosakaikisha kuti Yehova ekondwela ngako na zecicita Yakobo.

Nanga tyani masiku ŵano? Kansi tingaoneshe tyani kuti tulambila tyala Yehova? Cinthu cimozi cofunika ngako ni kupewa ciliconse cokatizhyana na kulambila mafano olo kukhulupilila zamizimu. Izi zuyangizhyilapo kutaya ciliconse cokatizhyana na zamasenga na kusankha zosangulusha mosamala. Mwacisanzo, tingazikonshe kuti: ‘Kansi nukonda kuŵelenga mabuku kapena kuonelela mafilimu oonesha vipuku, viŵanda na zamasenga? Kansi zosangulusha zanukonda zunicitisha kuganiza kuti zinthu zamasenga, kulowana olo kutembelelana kuliye vuto iliyonse?’ Tufunika kupewelatu ciliconse cakuzonda Yehova.—Sal 97:10.

ONELELANI VIDYO YA MUTU WAKUTI “SUSHANI MALEŴANIA,” NDIPO YANKHANI MAKONSHO AŴA:

• Kansi wophunzila Baibo wa zina yakuti Palesa ekumana na vuto yotyani?

• Ndaŵa yanji n’cinthu canzelu kusenga thandizo kuli akulu ngati mulimbana na zamizimu?

• Ngati tufuna kuti Yehova akotiteteza, ni vinthu votyani vatufunika kutaya?

• Ni cosankha cotyani cecipanga Palesa?

• Kulingana na kudela kwamunkhala, ni njila zotyani zamungapewele vocita va viŵanda?