Cikumbukilo cutipa shuko iweme yosinkha-sinkha pa madaliso a kusogolo amene okwanishika kamba ka dipo. Imo mwa madaliso amene aŵa ni ciukililo. Cenze lini colinga ca Yehova kuti ŵanthu akokufwa. Niye cifukwa cake tunkhala acisoni ngako keno munthu watukonda wamwalila. (1Akor 15:26) Yesu ecimvwa cisoni ngako peciona ophunzila ŵake olila imfwa ya Lazaro. (Yoh 11:33-35) Pofwana kuti Yesu etolela zocita za Awisi ndendende, tingaŵe osimikizhya kuti Yehova naye akumvwa caipa ngako kuona cisoni catunkhala naco keno munthu watukonda wamwalila. (Yoh 14:7) Yehova ni wofunishisha kuukisha atumiki ŵake ecifwa, nipo nase nise ofunishisha kuŵaona.—Yobu 14:14, 15.

Pofwana kuti Yehova ni Mulungu wadongosolo, tingankhale na cikhulupililo cakuti ciukililo cikacitike mwadongosolo. (1Akor 14:33, 40) M’malo molila malilo, tikankhale na nthawi yolondela ŵanthu oukishiwa. Ko musinkha-sinkha za cilolelo ca ciukililo, maka-maka pa nthawi yamwafwilwa munthu wamukonda? (2Akor 4:17, 18) Kansi mumuyamikila Yehova cifukwa ca dipo koma soti potiululila kupitila m’Malembo kuti akufwa akankhale soti na moyo?—Akol 3:15.

• Pa ayanu na a banja ŵanu ecifwa, mwa ni ŵani ŵamufunishisha kuyoona soti?

• Pa ŵanthu otomolewa m’Baibolo, kansi ni ŵani wamufunishisha kuyoona nolaŵila naye?