Pasika wosilizhyila wa Yesu wecizonkhala wofunika ngako. Pofwana kuti imfwa ya Yesu yenze pafupi ngako, ecita mwambo wa Pasika pamozi na atumwi ŵake. Ndipo pa mwambo uyu, Yesu eyambisha soti mwambo uyakine wa pacaka uitiwa kuti Cakulya Camcingulo ca Asikulu. Tetyo, etuma Yohane na Petulo kuti akakonze cipinda cocitilamo Pasika. (Luka 22:7-13; onani cithunzithunzi ca pacikuto.) Izi zutikumbusha kuti tufunika kukonzekela Cikumbuso cati cikacitike pa March 27. Mipingo yufunika kupanga makonzedwe yokhuza okamba nkhani, viphiphiliso na ziyakine zofunikila. Koma kansi n’cinji cakufunika kucita aliyense pokonzekela Cikumbuso?

Konzekeleshani mtima wanu. Ŵelengani nosinkhasinkha malemba opezeka pa kuŵelenga Baibo pa nyengo ya Cikumbuso. Ndandanda ya kuŵelenga Baibo mungaipeze m’kabuku ka Kusanthula Malemba Tsiku na Tsiku. Mungapeze soti ndandanda iyi mu buku yakuti Buku Lothandiza Pophunzila Mau a Mulungu ya m’Cinyanja peji 16. (Onani soti Kabuku ka Misonkhano ya Umoyo na Utumiki ka April 2020.) Mabanja angapeze soti mfundo ziyakine zokhuza kufunika kwa dipo pa kulambila kwao kwa pabanja, pofufuza m’buku ya Watch Tower Publications Index olo Buku Lofufuzila Nkhani la Mboni za Yehova.

Itilankoni ayakine kuti akapezekepo. Tolankoni mbali mokwanila pa kampeni yoitila ŵanthu ku Cikumbuso. Kansi ni ŵani ŵamungaitileko? Mungaitileko ŵanthu ŵamukonda kucitako ulwendo wowelelako, ŵemwenzophunzila nao Baibo, ayanu na abululu ŵanu. Akulu ofunika kuyesayesa kuitila ŵala ozilala. Kumbukilani kuti ngati munthu wamwaitila onkhala lini m’dela yanu, mungapeze nthawi na malo kwati kukacitikile Cikumbuso kudela kwakunkhala yove potinika polemba kuti ZOKHUZA SEO pa peji yoyambilila ya jw.org nosankha polemba kuti “Cikumbuso.”

N’cinji ciyakine catingacite pokonzekela Cikumbuso?