Malizu kwa Osonkhana
MAMITING’I YAPADELA
UTUMIKI WA PA BETELI Ofalisa obatizika a vyaka 35 kuwela pansi, amene ofuna utumiki wa pa Beteli, akapezeke pa miting’i ya okonshela utumiki wa pa Beteli mzuŵa pa siku yoyamba ya msonkhano. Akalengezeletu za nthawi na malo kwati kukacitikile miting’i yamene iyi.
SUKULU YA ALENGEZI AUFUMU Apainiya a vyaka va pakati pa 23 na 65 amene ofuna kuyangizhyila utumiki wao, osengewa kuyopezeka pa miting’i ya ofuna kuloŵa Sukulu ya Alengezi a Ufumu, pa siku yacitatu ya msonkhano. Akalengezeletu za nthawi na malo kwati kukacitikile miting’i yamene iyi.
MALIZU KWA OSONKHANA
AKALINDE Akalinde alipo kuti akutumikileni. Muwamila kukatizhyana nao pokonkha malangizo ŵao okhuza kopanamika mamotoka, manjinga, kusogolela ŵanthu, kusungilatu malo onkhala, na pa nkhani ziyambine.
DIPATIMENTI YA ZOTAIKA Zinthu zonse zopezeka zuwamila kutwaliwa ku Dipatimenti ya Zotaika. Keno mwataya ciliconse, lutani ku Dipatimenti yamene iyi noŵauzhya vamwataya. Ŵana amene asoŵa kuli makolo ŵao nao owamila kutwaliwa ku Dipatimenti yamene iyi. Nangu n’tetyo, muwamila kukumbukila kuti Dipatimenti yamene iyi ni kosasungila ŵana yayi. Tetyo muwamila kusamala ŵana ŵanu nipo mukonkhala nao pamozi.
MALO ONKHALA Muwamila kulingilila ayanu. Kumbukilani kuti mungasungile malo onkhala ŵanthu ŵamuyenda nao pamozi, ŵamunkhala nao ng’anda imozi, keno ŵamuphunzila nao Baibolo tyala. Tetyo musaike zinthu pa malo okuzungulilani.
NCHITO YOZIFUNILA Keno mufuna kuyavya nchito pa msonkhano, lutani ku Dipatimenti yamene iyi.
UBATIZO Malo onkhalapo akuya ku ubatizo akasungiwe kusogolo kwa pulatifomu. Keno pakankhale kucinja, cilengezo cikatwaliwe ku pulatifomu. Akuya ku ubatizo owamila kunkhala pa malo yaaŵasungila ikaliyoyamba nkhani ya ubatizo pa siku yaciŵili kum’mawa. Aliyense owamila kuleta thaulo na covwala ca ulemu coloŵa naco m’manzi.
ZACIPATALA Kumbukilani kuti Dipatimenti ya zacipatala ni ya zinthu zuwela MOSAYEMBEKEZELEKA TYALA.
ZOTWALA Poseŵenzeshewa ndalama zinyinji kuti pankhale malo onkhalapo okwanila, zolaŵililako, na zinthu ziyakine zoyavya kuti msonkhano uyende luweme, na kuti utiyavye kuvwendela pafupi na Yehova. Ndalama zamene izo zufumila pa zotwala zanu zolifunila, nipo zuyavya soti pa nchito ya pacalo conse. Kuti zisakuvuteni kupanga zotwala, muone mabokosi olembewa luweme amene aikiwa pamalo osiyanasiyana pa msonkhano uno. Tuyamikila ngako pa zotwala zanu zonse. Bungwe yolamulila yuyamikila ngako pa zotwala zamupanga popitisha pasogolo zinthu za Ufumu.
Wokonzewa na Bungwe Yolamulila ya Mboni za Yehova
