Lingililani cocitika ici: David oyendesha motoka kumalo kwaasaziŵa. Vikwangwani vuonesha kuti wasoŵa. Cuoneka kuti watola njila yolakwika.

Kuti mwenze David, ko mungacitenji?

Pali njila zitatu zamungaseŵenzeshe:

1. Kukonsha ŵanthu kuti muziŵe njila yoyenelela.

2. Kuona pa mapu, olo kuseŵenzesha GPS.

3. Kupitilizhya na ulwendo noganiza kuti kusogolo mupeze njila yoyenelela.

N’zoonekelatu kuti njila yacitatu ni yosayenela.

Njila yaciŵili ni iweme kupambana njila yoyamba, cifukwa cakuti mapu olo GPS ingakuyavyeni pa ulwendo wanu wonse nokuoneshani njila yoyenelela.

Molingana na izi, Baibolo ingakuyavyeni pa umoyo wanu!

Buku yamene iyi yopambana mabuku onse:

• ingakutangulileni pa umoyo wanu nipo ingakuyavyeni mwamungacitile na mavuto yamukumana nayo

• ingakuyavyeni kuzifufuza nonkhala munthu muweme ngako

• ingakuonesheni mwamungankhalile na umoyo uweme ngako

Tikangoyamba kulaŵila tukonsha makonsho.

• Ko zuŵa ikuya kuni usiku?

• Kansi nyenyezi ziliko zingani kululu?

Tikayamba kukula tukonsha makonsho monga akuti:

• Ndaŵa yanji vinthu viipa vucitika?

• Ndaŵa yanji ŵanthu akufwa?

Tyani keno mayankho yankhalamo m’Baibolo kwa nthawi itali?

Ŵanthu anyinji olaŵila kuti Baibolo ni buku ya nthano zeka-zeka, nipo olaŵila kuti ni buku yakale-kale koma soti ni yovuta kuimvwishisha. Koma kansi Baibolo niye ili na vuto, olo ko vuto ili na ŵanthu pa zakuganiza kuti oziŵa zokhuza Baibolo?

Mwacisanzo, ŵanthu oganiza kuti Baibolo yulaŵila kuti Mulungu niye olamulila calo. Koma ko zamene izi n’zacendi? Calo cino n’cosalamulilika! Cili na zoŵaŵa na mavuto ŵeka-ŵeka, matenda na ifwa, umphawi na ngozi zacilengedwe. Ko zingakwanishike tyani kuti Mulungu wacikondi acitishe zamene izi?

Kansi mungafune kuziŵa mayankho? Mungadabwe na zayulaŵila Baibolo pa nkhani yokhuza wolamulila wa cino calo!

Payakine mwaona kuti malangizo ali m’kabuku kano ni ozikiwa pa Baibolo. Mboni za Yehova zusimikizhya kuti Baibolo ni buku ya malangizo odalilika. Izi zili tetyo cifukwa cakuti ni “youzhyiliwa na Mulungu nipo ni yopindulisha pa kuphunzisa, kuzuzula, kulungamika zinthu na kulangiza m’cilungamo.” (2 Timoteyo 3:16, 17) Muwamila kuiphunzila buku yamene iyi!