KONSHO 3
Kansi Ningacitenji Kuti Nikolaŵila Momasuka na Makolo Ŵangu?
KO MWEO MUNGACITENJI?
Lingililani cocitika ici: Pa Citatu mcingulo, Geoff, wamene ali na vyaka 17, wasilizhya nchito za pamlyango nipo olingilila zopumula. Oyasha TV nonkhala pampando wakukonda.
Nthawi yamene iyo, Awisi otulikila nipo ooneka kuti akalipa.
“Geoffrey! Ndaŵa yanji uceneka nthawi kuonelela TV m’malo mwakuti ukayavye msaza wako kulemba homuweki? Ukumvwa lini weo!”
Geoff oyankha mwamwano kuti: “Mwayamba volaŵila-laŵila.”
Awisi ovwendela pafupi nomukonsha kuti: “Wati cinji?”
Geoff oyankha mwamwano kuti: “Paliye.”
Awisi akalipa nipo omuuzhya kuti: “Weo, osalaŵila teti na neo!”
Kuti mwenze Geoff, kansi mungacitenji kuti musakangane na kolo yanu?
GANIZILANI IZI!
Kulaŵila na makolo ŵanu kuli monga ni kuyendesha motoka. Keno mwapeza cikwangwani coonesha kuti mseu wavaliwa, mungazhyoke lini koma mungaseŵenzeshe njila iyakine.
MWACISANZO:
Msimbi muyakine wa zina yakuti Leah elaŵila kuti, “Zunivuta kulaŵila na atata. Nthawi ziyakine nuŵafotokozela zinthu zinyinji, koma pavuli pake olaŵila kuti, ‘Pepa, kansi wenzolaŵila na neo?’”
PALI NJILA ZITATU ZAANGAKONKHE LEAH.
-
Angaŵakalipile awisi.
Leah olaŵila mokalipa kuti, “Mvwishilani zanufuna kukuuzhyani! Nkhani yake ni yofunika ngako!”
-
Angaleke kulaŵizhyana na awisi.
Leah oleka kulaŵila na awisi za vuto yake.
-
Angayembekeze kuti alaŵizhyane na awisi nthawi iyakine.
Leah oyembekeza kuti alaŵile na awisi nthawi iyakine olo kuŵalembela kalata yofotokoza vuto yake.
Kansi mweo mulingilila kuti Leah angasankhe njila yotyani?
LINGILILANI IZI: Awisi a Leah atangwanika na zinthu ziyakine zamene zacitisha kuti asaziŵe kuti mwana wao wakhumudwa. Tetyo keno Leah wasankha Njila Yoyamba, awisi angaziŵe lini zacitisha kuti yove akhumudwe. Nipo kucita zamene izi kungacitishe lini kuti awisi amvwishile koma soti zingaoneshe kuti oŵalemekeza lini. (Aefeso 6:2) Tetyo, njila yamene iyi ingayavye lini nangu patontho.
Molingana na izi, muwamila lini kulola ciliconse kukukangishani kulaŵizhyana na makolo ŵanu.
Njila Yaciŵili ingankhale yosavuta koma ni yosayavya. Ndaŵanji? Kuti asilizhye vuto yake, Leah owamila kulaŵizhyana na awisi, koma zingankhale zovuta kuti awisi amuyavye keno oziŵa lini zumucitikila pa umoyo wake. Tetyo kuleka kulaŵila nao kungayavye lini.
Njila Yacitatu, Leah aliyosankhe tyala kuleka kulaŵila na awisi cifukwa cakuti omumvwishila lini. M’malo mwake yove waona kuti pali luweme kuti alaŵile nao nthawi iyakine. Nipo kulembela kalata awisi kungamuyavye kuti amvweko luweme nangu akaliyomuyankha.
Koma soti kulemba kalata kungamuyavye kuti afotokoze luweme vuto yake koma soti mwaulemu. Awisi akaŵelenga kalata angaziŵe zakufuna kuŵafotokozela mwana wao, zamene zingaŵayavye kumvwisha vuto yake. Tetyo njila yacitatu ingayavye Leah koma soti awisi. Keno wasankha kulaŵila nao olo kuŵalembela kalata, njila yamene iyi ni yokatizhyana na malangizo a m’Baibolo akuti tuwamila “kukonkha zinthu zoleta mtendele.”—Aroma 14:19.
Kansi pali njila ziyakine zaangakonkhe Leah?
Lingililani njila imozi nipo ilembeni. Pavuli pake lembani zingacitike keno wakonkha njila yamene iyi.
MUKOSAMALA NA ZAANGAGANIZE MAKOLO ŴANU
Ziŵani kuti nthawi ziyakine zaangamvwe makolo ŵanu zingankhale zosiyana na zamwalaŵila mweo.
MWACISANZO:
Makolo ŵanu okukonshani cifukwa cake muoneka okalipa. Muyankha kuti, “Nufuna lini kuti tilaŵizhyane nkhani yamene iyi.”
Makolo ŵanu angalingilile kuti mutanthauza kuti: “Nukukhulupililani lini tetyo ningakuuzhyeni lini. Pali luweme kuuzhya ayangu m’malo mouzhya mweo.”
Lingililani kuti mwakumana na vuto iyakine nipo makolo ŵanu ofuna kukuyavyani. Keno mungayankhe makolo ŵanu kuti: “Musadandaule. Nilimbane nayo neka vuto yamene iyi.”
-
Makolo ŵanu angalingilile kuti mulaŵila kuti:
-
Njila iweme ni kulaŵila kuti:
