KONSHO 6
Kansi Ningapewe Tyani Kutolela Zocita za Ayangu?
KO MWEO MUNGACITENJI?
Lingililani cocitika ici: Brian okumana na ayake aŵili a kusukulu nipo ocita wowa. Kaŵili konse m’sondo ino ayesa kumunyengelela kuti apepe fwaka. Aka kankhale kacitatu.
Muyake woyamba olaŵila kuti:
“Uli weka na lelo ka? Leka nikupaseko muyako wotandala naye.”
Pakulaŵila kuti “muyako,” okata mthumba nofumya ndudu ya fwaka notambikizhya Brian.
Brian oona ndudu ya fwaka pakati pa vikumo va muyake. Wowa wa Brian ukula.
Brian olaŵila kuti: “Pepani, nekuuzhyani kale kuti . . . ”
Muyake waciŵili omutenda malizu nolaŵila kuti: “Osankhala na wowa woteti!”
Brian olaŵila motang’a mtima kuti: “Nucita lini wowa!”
Muyake waciŵili omuika kwanja papewa nomunyengelela kuti: “Tola tyala.”
Muyake woyamba oleta ndudu ya fwaka pafupi na pamenso pa Brian noŵeleŵesha kuti: “Tiuzhye lini aliyense. Paliye aliyense ati aziŵe.”
Kuti mwenze Brian, ko mungacitenji?
GANIZILANI IZI!
Kansi ayake a Brian elingililapo pa vinthu vakucita? Kansi ove eyamba tyani nkhalidwe iipa yamene iyi? Anyinji ocita izi cifukwa cotolela ayao. Ofuna kuti ayao akoŵakonda, tetyo ongocita zakufuna ayao.
Keno namwe mwakumana na ciyeso coteti, kansi mungacitenji kuti musankhe kucita zinthu zosiyana na zakucita ayanu?
-
KONZEKELANI
Baibolo yulaŵila kuti: “Wocenjela ni ula ocita akaona soka ofisama, koma ŵanthu osaziŵa zinthu opitilizhya nipo olangiwa.”—Miyambo 22:3.
N’zosavuta kuziŵilatu zinthu zamene ayanu angakukakamizhyeni kucita. Mwacisanzo, mungaone ayanu a kusukulu akuza kusogolo kwanu uku opepa fwaka. Koma mukakonzekelelatu, zingakuvuteni lini kukana.
-
ZIKONSHENI
Baibolo yulaŵila kuti: “Nkhalani na cikumbumtima ciweme.”—1 Petulo 3:16.
Mungazikonshe kuti, ‘Kansi nimvwe tyani nikacita zakucita ayangu?’ N’cendi kuti mukacita nao zamene izo, ayanu angakukondeni. Koma ko mungamvwe tyani pavuli pake? Ko mungakonde kukondwelesha ayanu a kusukulu m’malo mokondwelesha Mulungu?—Ekisodo 23:2.
-
SANKHANI ZOCITA
Baibolo yulaŵila kuti: “Munthu wanzelu ocita wowa nipo opatuka pa ciipa.”—Miyambo 14:16.
Tonse tuwamila kupanga cosankha nonkhala okonzeka kukumana na zofumapo za cosankha casu. Baibolo yutiuzhya za analume monga Yosefe, Yobu, na Yesu amene epanga zosankha zanzelu. Yutiuzhya soti kuti Kaini, Esau na Yudasi aliyopange zosankha zanzelu. Namwe muwamila kupanga zosankha.
Baibolo yulaŵila kuti: “Nkhala wokhulupilika m’zocita zako zonse.” (Salimo 37:3) Keno mwalingilila kale kuipa kwake nipo mwasankha kale zocita, mungavutike lini kulaŵila maganizo ŵanu.
Mungafunikile lini kucitoŵalalikila ayanu. Kungolaŵila kuti YAI kungankhale kokwanila. Keno mufuna kuŵasimikizhyila kuti mucinja lini maganizo ŵanu, mungalaŵile kuti:
-
“Nufuna lini kuti zamene izo zinikhuze!”
-
“Ningacite lini zamene izo!”
-
“Namwe muziŵa kuti ningacite lini zamene izo!”
Kuyankha mwamphamvu koma soti motang’a mtima kungacitishe kuti ayanu aleke kukuvutishani.
ZAMUNGACITE KENO AYANU OKUNENANI
Keno muvomela kucita zakufuna ayanu munkhala monga ni ciloboti, nipo izi zingacitishe kuti ayanu akolamulila umoyo wanu
Kansi mungacitenji keno ayanu okunenani? Tyani keno akuneneni kuti, “Niwe wawowa ŵati?” Akalaŵila zamene izi musadabwe cifukwa ove ofuna tyala kukunyengelelani. Koma ko mungaŵayankhe tyani? Pali njila ziŵili zamungaŵayankhilemo.
-
Mungavomelezhye zakukunenani. (“Mulaŵila cendi, nine wawowa!” Pavuli pake fotokozani mwacidule cifukwa camucitila wowa.)
-
Namwe mungaŵapanikizhye. Fotokozani cifukwa camukanila, nipo aonesheni kuti zakucita ziliye nzelu. (“Nukuonani monga nimwe ŵanthu anzelu amene mungapepe lini fwaka!”)
Keno ayanu opitilizhya kukuvutishani, fumamponi cifukwa mukapitilizhya kunkhala pamene apo, zinthu zingaipe ngako. Ziŵani kuti mukafumapo muoneshe kuti muliyofune kucita zakufuna ove.
Kulaŵila cendi, n’zosakwanishika kupewelatu kuvutishiwa na ayanu. Koma mungakwanishe kusankha zamufuna kucita, kulaŵila maganizo ŵanu nocita zilizonse zamungakwanishe kuti ayanu osati akokuvutishani. Nipo ziŵani kuti ni udindo wanu kusankha zocita!—Yoswa 24:15.
