KONSHO 7
Ko Ningacitenji Keno Muyangu Onikakamizhya Kuti Tilalane?
KO MWEO MUNGACITENJI?
Lingililani cocitika ici: Papita tyala miyezi iŵili kufumila peciziŵana Heleni na Mike koma ocita monga kuti eziŵana kale-kale. Otumizhyilana mameseji pafupi-pafupi, otandala pa foni kwa nthawi itali cakuti ŵene ŵake oona kuti zonse zili tyala luweme. Koma Mike ofuna kuti kutandala kwao kupitilile apa.
Pa miyezi iŵili yapita, Mike na Heleni enzocita lini zinyinji, enzokatana tyala manja na kukising’ana patontho. Heleni ofuna lini kucita zakufuna Mike koma oyopa kuti akakana cisumbali cao cingasile. Yove omukonda ngako Mike cifukwa zakumucitila zumupangisha kuziona kuti ni wokongola koma soti wapadela. Mumtima mwake onena kuti, ‘Neo na Mike tukondana ngako . . .’
Keno mwafwika pamsinkhu wakuti mungankhale pacisumbali nipo mwakumana na ciyeso monga ni ca Heleni, ko mungacitenji?
GANIZILANI IZI!
Kulalana ni mphaso yecitwala Mulungu kuli ŵanthu olungulana tyala. Kulalana na munthu mukaliyolungulana ni kuononga mphaso yamene iyi. Kulalana na munthu mukaliyoloŵa m’banja kuli monga ni kutola suti yamtengo wapatali yecikupasani muyanu noyamba kukolopela mu ng’anda
Keno munthu waphwanya lamulo iyakine okumana na mavuto. Zamene izi niye zingacitike mukaphwanya lamulo yakuti: “Mukopewa dama.”—1 Atesalonika 4:3.
Kansi munthu wamene waphwanya lamulo yamene iyi angakumane na mavuto otyani? Baibolo yulaŵila kuti: “Wamene ocita dama ocimwila muŵili wake.” (1 Akorinto 6:18) Ko zamene izi n’zacendi?
Ofufuza apeza kuti acilumbwana anyinji amene ocita ciwelewele akaliyoloŵa m’banja okumana na mavuto monga aŵa:
-
KUVUTIKA MAGANIZO. Acilumbwana anyinji amene elalanapo akaliyoloŵa m’banja odandaula nipo olaŵila kuti sembe aliyocite zamene izo.
-
KUSAKHULUPILILANA. Acilumbwana amene ali pacisumbali akalalana, aliyense oyamba kuzikonsha kuti, ‘Niye kuti wacita zamene izi na ŵanthu angani?’
-
KUKHUMUDWA. Nangu asimbi amene ovomela kulalana na alumbwana, mumtima mwao ofuna mwanalume wamene angaŵateteze osati kungoŵaseŵelesha. Nipo alumbwana oona soti kuti msimbi wamene wavomela kulala nao oŵakondwelesha lini soti monga ni poyamba.
-
Mfundo yofunika kuikumbukila ni yakuti: Keno mwavomela kulalana na munthu wamuli naye pacisumbali, mungazicosele ulemu. (Aroma 1:24) Muŵili wanu ni wamtengo wapatali ngako nipo musauchipishe!
Mukoonesha kuti nimwe wofunishisha kukonkha lamulo ya Mulungu yakuti “mukopewa dama.” (1 Atesalonika 4:3) Nipo mukayolungula, mukosangalala kulalana na mkazi olo mulume wanu. Nipo mukokhumudwa lini olo kunkhala na nkhaŵa yakunkhala nayo ŵanthu anyinji akalalana na munthu akaliyoloŵa m’banja.—Miyambo 7:22, 23; 1 Akorinto 7:3.
KO MULINGILILA TYANI?
-
Kansi munthu wamene okukondani cendi angacite zinthu zamene zingakuonongeni?
-
Ko munthu wamene okukondani angakunyengeleleni kuti musokoneze ushamwali wanu na Mulungu?—Aheberi 13:4.
