KONSHO 1
Ko Nuziŵa Mfundo Zanuyendela?
KO MWEO MUNGACITENJI?
Lingililani cocitika ici: Karen wangofwika kuphwando nipo akumvwa muyake omukonsha kuti:
“Kansi weo wankhalilanji ndwii pamene apo?”
Karen ocunguluka noona muyake Jessica wanyamula mabotolo aŵili a walwa oseguliwa kale. Jessica opasa Karen botolo imozi nomuuzhya kuti, “Ani mwako, kusangalalako nthawi ziyakine, niwe lini mwana kuti ungakangiwe kumwa walwa.”
Karen ofuna kukana koma oona kuti n’zovuta cifukwa Jessica ni muyake. Nipo Karen ofuna lini kuoneka kuti osangalalako lini. Koma soti Karen oona kuti Jessica ni munthu wabwino. Keno yove akumwa, niye kuti kumwa kuliye vuto iliyonse. Karen oganiza kuti: ‘Uyu ni walwa tyala, kumwa walwa kungalingane lini na kuseŵenzesha mankhwala osokoneza tomfwe.’
eno mwakumana na ciyeso monga ca Karen, ko mungacitenji?GANIZILANI IZI!
Kuti mupange cosankha canzelu mukakumana na ciyeso coteti, muwamila kuziŵa mfundo zamuyendela. Munthu wamene oziŵa mfundo zakuyendela otolela lini zakucita ayakine. Keno muziŵa mfundo zamuyendela, ŵanthu ayakine angakukakamizhyeni lini kucita zinthu zamene zingakuikeni m’mavuto.—1 Akorinto 9:26, 27.
Kansi ni cinji cingakuyavyeni kuti mukocita zinthu motang’a mtima? Coyamba mungacite luweme kuzikonsha makonsho aya:
1 KANSI NUCITA LUWEME PA ZINTHU ZOTYANI?
Kuziŵa zinthu zamucita luweme na zamungakwanishe kucita kungakuyavyeni kuti mupewe kucita zinthu mokaikila.
CISANZO CA M’BAIBOLO: Mtumwi Paulo elemba kuti: “Keno niliye luso yolaŵila, cutanthauza lini kuti nuziŵa lini kanthu.” (2 Akorinto 11:6) Paulo enzoziŵa luweme Malembo, tetyo keno ŵanthu omuneneza enzoziŵa coyankha nipo enzolola lini kuti zolaŵila zao zimufookeshe.—2 Akorinto 10:10; 11:5.
ZIFUFUZENI. Lembani luso iliyonse yamuli nayo, olo cinthu ciliconse camucita luweme.
Lomba lembani nkhalidwe iweme yamuli nayo. (Mwacisanzo, ko muganizila ŵanthu ayakine? muli na wanzi? nimwe odalilika? woziŵa kusunga nthawi?)
2 KO NI ZINTHU ZOTYANI ZANISACITA LUWEME?
Moyo wanu uli monga ni cheni. Cheni yupangiwa na mawaya osiyana-siyana yamene yolumikizhyana pamozi. Keno waya umozi wankhala wosatang’a, cheni ingatendeke. Tetyo, keno namwe mungalole kuti cinthu ciyakine camusacita luweme cikufookesheni, moyo wanu ungasokonezeke.
CISANZO CA M’BAIBOLO: Paulo enzoziŵa zinthu zeenzocita lini luweme. Yove elemba kuti: “Mumtima mwangu nusangalala ngako na cilamulo ca Mulungu, koma nuona cilamulo ciyakine m’ziwalo zangu culimbana na cilamulo ca m’maganizo mwangu nonipanga kunkhala kapolo wa cilamulo ca ucimo.”—Aroma 7:22, 23.
ZIFUFUZENI. Kansi ni zinthu zotyani zamusacita luweme zamungafunikile kucinja?
3 KANSI ZOLINGA ZANGU N’ZOTYANI?
Ko mungabuking’e motoka nouzhya dilaiva kuti mukongozunguluka pa malo amozi na amozi mpaka motoka kusila mafuta? Kucita zamene izi kungankhale kusoŵa nzelu cifukwa kungakuonongeleni tyala nthawi na ndalama.
Phunzilo ni yakuti: Muwamila kunkhala na zolinga kuti mukocita zinthu zopindulisha zeka-zeka. Mukankhala na zolinga, muziŵe kwamukuya.
CISANZO CA M’BAIBOLO: Paulo elemba kuti: “Sikuti nungoutuka osaziŵa kwanuloŵela.” (1 Akorinto 9:26) M’malo mocita zinthu mwacisawawa, Paulo enze na zolinga pa umoyo wake zamene enzoyesesa kuti azikwanilishe.—Afilipi 3:12-14.
ZIFUFUZENI. Lembani zolinga zitatu zamufuna kuyokwanilisha caka cikuza.
4 KO NUKHULUPILILA MFUNDO ZOTYANI?
Keno muziŵa luweme mfundo zamuyendela, munkhale monga ni cimuti cotang’a camene cingapone lini nangu kuti kwawela cimphepo cikulu
Keno muliye mfundo zilizonse zamukhulupilila, mukongocita zinthu mwacisawawa. Molingana na lumvwi, mukongocinja-cinja kuti mukatizhyane na zakucita ayanu. Munthu wamene ocinja-cinja oonesha kuti aliye mfundo zakuyendela pa umoyo wake.
Mosiyana na izi, keno nthawi zonse mucita zinthu mokatizhyana na mfundo zamuyendela, mungatolele lini zocita za ŵanthu ayakine.
CISANZO CA M’BAIBOLO: Peenze wacilumbwana, mneneli Danieli “esimikizhya mumtima mwake” kukonkha malamulo a Mulungu, nangu kuti yove enze kutali na makolo ŵake. (Danieli 1:8) Mwa kucita zamene izi, Danieli aliyoyese nangu patontho kucita zinthu zosiyana na mfundo zenzokhulupilila.
ZIFUFUZENI. Ko ni mfundo zotyani zamukhulupilila? Mwacisanzo: Kansi mukhulupilila kuti kuli Mulungu? Keno n’tetyo, ndaŵanji? Ko muli na umboni wotyani wamene ukusimikizhyilani kuti Mulungu aliko?
Ko mukhulupilila kuti kukonkha malamulo a Mulungu n’kopindulisha? Keno n’tetyo, ndaŵanji?
Kansi mweo mungafune kunkhala monga ni citepo camene cumbululuka tyala na mphepo, olo mungafune kunkhala monga ni cimuti cotang’a camene cingapone lini nangu kuti kwawela cimphepo camphamvu? Keno mufuna kunkhala monga ni cimuti cotang’a, muwamila kunkhala na mfundo zamukhulupilila. Zamene izi zingakuyavyeni kuti osati mukongotolela zocita za ayanu.
