Lingililani cocitika ici: Julia akalolesha pa gilasi, oziona kuti ni woina ngako. Yove olaŵila kuti, “Nuwamila kuyondako,” nangu kuti makolo ŵake na ayake omuuzhya kuti ni “woyonda.”

Julia olingilila kuti owamila kucitapo kanthu kuti acoseko “makilogilamu aŵili tyala.” Olingilila kuti owamila kulala njala kwa masiku oŵelengeka . . .

Keno mukumvwa monga ni mweenzomvwila Julia, ko mungacitenji?

N’kulakwa lini kulingilila za maonekedwe ŵanu. Nipo Baibolo yulaŵila kuti anakazi na analume ayakine monga Sara, Rakele, Abigayeli, Yosefe na Davide enze okongola. Baibolo yulaŵila soti kuti munakazi muyakine woziŵika na zina yakuti Abisagi enze “wokongola ngako.”—1 Mafumu 1:4.

Koma acilumbwana anyinji oganizila ngako za maonekedwe ŵao. Zamene izi zingalete mavuto anyinji. Mwacisanzo:

• Ofufuza ayakine epeza kuti asimbi okwanila 58 pa 100 alionse enzoziona kuti ni oina ngako, koma mfundo yacendi ni yakuti ni asimbi tyala 17 pa 100 alionse amene enze cendi oina ngako.

• Pakufufuza kuyakine, epeza kuti anakazi 45 pa 100 alionse amene enze oyonda enzoziona kuti ni oina ngako.

• Pofuna kuyonda, acilumbwana ayakine ocepesha kalyedwe. Vuto yamene iyi ni yoyofya nipo yuyamba keno munthu wayamba kusafuna cakulya.

 Keno mwayamba kusafuna kulya, mufunikila thandizo. Uzhyani makolo ŵanu za vuto yamene iyi olo munthu aliyense mkulu wamukhulupilila. Baibolo yulaŵila kuti: “Shamwali wene-wene okukonda nthawi zonse, nipo yove ni mkwako wamene evyalika kuti akuyavye pakankhala mavuto.”—Miyambo 17:17.

Baibolo yulaŵila lini kuti kukongola kwa munthu ni maonekedwe ŵake tyala yai, koma owamila kunkhala soti na nkhalidwe iweme yokondwelesha Mulungu. Lingililani za Abisalomu, mwana wa Mfumu Davide. Baibolo yulaŵila kuti:

“Paliye munthu enze wotamandika ngako kupambana Abisalomu cifukwa ca kukongola kwake. Yove enzeve cilema ciliconse.”—2 Samueli 14:25.

Koma mlumbwana uyu enze wolikuzhya koma soti wansanje. Tetyo, Baibolo yulaŵila kuti Abisalomu enze munthu wosakhulupilika nipo enze muipa mtima ngako.

Niye cifukwa cake Baibolo yutipasa malangizo akuti:

“Muvwale umunthu walomba.”—Akolose 3:10.

“Kuzikongolesha kwanu kusankhale kwakunja. . . . Koma kunkhale kwa munthu wofisika wamumtima.”—1 Petulo 3:3, 4.

Nangu kuti maonekedwe ni ofunika, minkhalidwe iweme niye yofunika ngako. Koma soti minkhalidwe yauzimu niye ingakucitisheni kuti munkhale munthu wokumbwilika kupambana kunkhala wokongola. Msimbi muyakine wa zina yakuti Phylicia elaŵila kuti, “N’cendi kuti ŵanthu angatoleke nawe kamangu cifukwa ca maonekedwe ŵako. Koma ŵanthu okukumbukila ngako cifukwa ca umunthu wako koma soti nkhalidwe yako iweme.”

Kansi musangalala lini na mwamuonekela?

Ko mukana kulya cifukwa cakuti mufuna kuyonda?

Kansi n’zinthu zotyani pa muŵili wanu zamungakonde kuti zicinje? (Congani zamwasankha.)

• MSINKHU

• KUINA

• SISI

• MUŴILI

• PAMENSO

• MAONEKEDWE

Musadandaule keno mwayankha makonsho aŵili oyambilila kuti “eee” koma soti keno mwaconga zinthu ziŵili olo zopitililapo. Ziŵani kuti ŵanthu ayakine okuonani lini kuti muoneka lini luweme. Acilumbwana anyinji osangalala lini na mwakuonekela.—1 Samueli 16:7.