Lingililani cocitika ici: Poseŵela na ayake, Tim waphwanya gilasi na bola.

Kuti mwenze Tim, ko mungacitenji?

PALI NJILA ZITATU ZAMUNGAKONKHE:

1. Kuthaŵa.

2. Kupasa mlandu muyanu.

3. Kuulula zamwacita, nonkhala okonzeka kulipila zamwaononga.

Payakine mungakonde kusankha Njila Yoyamba. Koma pali zifukwa zomvwika zoonesha kuti kuvomelezhya zamwalakwisa n’koyavya—keno ni kuphwanya windo olo cinthu ciyakine.

1. N’cinthu coyenela kuvomelezhya zatalakwisa.

   Baibolo yulaŵila kuti: “Tufuna kucita zinthu zonse moona mtima.”—Aheberi 13:18.

2. Nthawi zinyinji ŵanthu okhululukila ŵala ovomelezhya zolakwa zao.

   Baibolo yulaŵila kuti: “Wofisa macimo ŵake zinthu zimuyendele lini luweme, koma woulula noŵasiya acitiliwe cifundo.”—Miyambo 28:13.

3. Cifukwa cikulu n’cakuti, zukondwelesha Mulungu.

   Baibolo yulaŵila kuti: “Munthu wocita zacinyengo Yehova onyansiwa naye, koma okonda ŵanthu oongoka mtima.”—Miyambo 3:32.

Karina, wamene ali na vyaka 20, eyesa kufisa lisiti yoonesha kuti apolisi emulipilisha cifukwa coutukisha ngako motoka. Koma m’kuluta kwa nthawi zeululika. Yove elaŵila kuti: “Pavuli pa caka cimozi, atata epeza lisiti yoonesha kuti nthawi iyakine apolisi enilipilisha cifukwa coutukisha ngako motoka. Enikalipila ngako!”

Zataphunzilapo: Karina elaŵila kuti: “Munthu ukafisa zinthu zawalakwisa ucitisha kuti zinthu ziipe ngako. Pakapita nthawi ukumana mphela na zofumapo za zinthu zewelakwisa!”

Baibolo yulaŵila kuti: “Tonse tulakwisa zinthu nthawi zinyinji.” (Yakobo 3:2) Nipo monga ni mwataonela, munthu uonesha kuti niwe wolicefya koma soti wolingilila luweme ukavomelezhya kuti walakwisa nthawi yamene iyo.

Cinthu ciyakine cofunika ni kuphunzila pa zinthu zamwalakwisa. Msimbi muyakine wa zina yakuti Vera elaŵila kuti: “Nuyesa-yesa kuphunzilapo kanthu pa ciliconse canalakwisa kuti zikoniyavya kunkhala munthu muweme koma soti kuti nizacite zinthu mwanzelu nikayokumana na zinthu zolingana na zanalakwisa.” Tiyeni tione mwamungacitile zamene izi.

Mwazhyamika njinga ya ausuwanu nipo yaonongeka. Ko mungacitenji?

• Osaulula noganiza kuti ausuwanu aziŵe lini.

• Kuuzhya ausuwanu zamwalakwisa.

• Kuuzhya ausuwanu zamwalakwisa koma mulaŵila kuti muyanu niye wacitisha.

Mwafeluka mayeso ku sukulu cifukwa cakuti muliyoŵelenge. Ko mungacitenji?

• Kulaŵila kuti mayeso yenze yokosa.

• Kuvomelezhya kuti mwafeluka cifukwa cakuti muliyoŵelenge.

• Kulaŵila kuti aticha okuzondani.

 Lomba lingililani za zocitika zafotokozewa palulu nipo lingililani kuti mweo nimwe (1) atata olo (2) aticha. Kansi ausuwanu olo aticha ŵanu angakuoneni tyani keno mwavomelezhya zamwalakwisa? Ko angakuoneni tyani keno mwafisa zamwalakwisa?

Lomba lingililani za zinthu zemwelakwisa caka casila noyankha makonsho aŵa:

Kansi ni cinji cemwelakwisa? Ko mwecitanji pemweona kuti mwalakwisa?

• Nefisa osaulula.

• Nepasa munthu muyakine mlandu.

• Nevomelezhya nthawi yamene iyo.

Keno muliyovomelezhye zemwelakwisa, ko mwecimvwa tyani pavuli pake?

• Necimvwa tyala luweme—Paliye ciliconse cecitika!

• Neziimba mlandu—Sembe nelaŵila cilungamo.

Ko mulingilila kuti sembe mwecita tyani kuti zinthu ziyende luweme?

Kansi ni cinji cemwephunzilapo pa colakwa canu?

Ndaŵa yanji ŵanthu ayakine ofuna lini kuulula zolakwa zao?

Kansi ŵanthu ayakine angakuoneni tyani keno nthawi zonse muyesa kufisa zolakwa zanu, nipo angakuoneni tyani keno muvomelezhya zolakwa zanu?—Luka 16:10.