Mukalungulana mutatika umoyo wa banja walomba. Nangu kuti muwamila kupitilizhya kuŵatemwa noŵacinzika makolo ŵanu, mukokumbukila kuti lomba muyanu wam’cikwati niye wofunika ngako kwa mweo pacalo conse. Ayambine mwa a banja ŵanu angavutike kuti amvwishe zamene izi. Koma mfundo za m’Baibolo zingakuyavyeni kuona zinthu moyenela. Kucita zamene izi kungakuyavyeni kunkhala pamtendele na a banja ŵanu pamuyesa-yesa kuti muyoŵelele umoyo walomba wa banja.

ZAYULAŴILA BAIBOLO: “Ukocinzika auso na anyoko.” (Aefeso 6:2) Nangu kuti mukule tyani, muwamila kucinzika makolo ŵanu nsita zonse. Mukozindikila kuti naye muyanu wam’cikwati ali na makolo nipo owamila kuŵasamalila. “Cinthemwa ciliye ukwa,” tetyo osamvwa caipa mukaona kuti muyanu okatizhyana ngako na a banja ŵake.—1 Akorinto 13:4; Agalatiya 5:26.

ZAMUNGACITE:

• Lewani kulaŵila malizu n’nga yakuti “Banja yako yuniŵelengela lini neo” keno yakuti “Anyoko otemwa lini na vanucita”

• Yesa-yesani kuona zinthu mwakuzionela muyanu

ZAYULAŴILA BAIBOLO: “Mwanalume akasiye awisi na anyina na kuyoziphatika kuli mkazi wake, nipo ŵeve akaŵe muŵili umo.” (Genesis 2:24) Mukalungulana makolo ŵanu angaone kuti akali na udindo wokusamalilani, nipo angapangwe kuloŵelelamo m’cikwati canu nocita vinthu mopitilila malile.

Mweo na muyanu wam’cikwati muli na udindo woikila malile makolo ŵanu pa nkhani zokhuza cikwati canu. Mwacinthemwa, muwamila kuŵauzhya pangapelele. Nkhalani omasuka polaŵizhyana nao nipo musapite m’mbali. Laŵizhyanani nao mwaulemu osati mwaukali. (Miyambo 15:1) Kulicefya, kusisikanya, na kuleza mtima kukuyavyeni kunkhala paunansi uweme na a banja ŵanu nopitilizhya “kulolelana umo na muyake mwacitemwano.”—Aefeso 4:2.

ZAMUNGACITE:

• Keno muona kuti a banja oloŵelelapo ngako pa zocitika za m’banja mwanu, muwamila kulaŵizhyana na muyanu wam’cikwati pa nsita yakuti zinthu zili luweme

• Muwamila kupangana mwati mukocitila zinthu