N’nga ni mwamwasambilila m’kabuku kano, Baibolo ili na mfundo zinyinji zingakuyavyeni mweo na banja yanu. Yehova opangwa kuti muŵe otemwa. Yove olonjeza kuti keno muika kulambila kwake panthangu, “zinthu ziyakine zonse ziyangizhyiliwe kwa mweo.” (Mateyu 6:33) Yove ofunishisha kuti muŵe shamwali wake. Onesheshani kuti museŵenzesha mpata uliwonse kuti mukulishe ushamwali wanu na Mulungu. Iyi ni shuko iweme ngako yamene munthu angaŵe nayo—Mateyu 22:37, 38.

ZAYULAŴILA BAIBOLO: “‘Nizenkhale ausu wanu, nipo mweo muzenkhale ŵana ŵangu anakazi na analume,’ watetyo Yehova.” (2 Akorinto 6:18) Mulungu opangwa kuti muŵe shamwali wake wa pamtima. Lombelo ni njila imo yatingacitile zamene izi. Yehova otisenga kuti tikolomba kwa yove“nsita zonse.” (1 Atesalonika 5:17) Yove ni okonzeka kumvwishila malingililo yali mumtima mwasu na zutivuta. (Afilipi 4:6) Keno mweo mulomba pamo na banja yanu, weve aone keno Mulungu ni wene-wene kwa mweo.

Kuyangizhyila pa kulaŵila na Mulungu, muwamila kumvwishila kwa yove. Mungacite zamene izi mwa kusambila malizu ŵake na mabuku yozikiwa pa Baibolo. (Salimo 1:1, 2) Sinkha-sinkhani pa zamwasambila. (Salimo 77:11, 12) Kumvwishila kwa Mulungu kufuna kuti mukopezeka nsita zonse pa maungano acikhilisitu.—Salimo 122:1-4.

Kulaŵila na ŵanthu ayakine za Yehova ni njila iyakine yofunika ngako yatingatang’ishile ushamwali wasu na yove. Kuŵilizhya kaŵili-kaŵili, kukuyavyeni kuti muvwendele pafupi na yove.—Mateyu 28:19, 20

ZAMUNGACITE:

• Nsita zonse mukopatula nthawi yoŵelenga Baibulo no lomba

• Monga banja, muwamila kuika zinthu za kuuzimu pamalo otatika m’malo mwa zosangulusha na kupumula

ZAYULAŴILA BAIBOLO: “Vwendelani pafupi na Mulungu, naye avwendele pafupi na mweo.” (Yakobo 4:8) Muwamila kunkhala na ndandanda yonkhazikika ya kulambila kwa pa banja noikonkha. (Genesis 18:19) Koma muwamila kucita zinyinji kupula pamene apo. Mulungu owamila kuŵa mbali ya moyo wanu wa nsiku na nsiku. Muwamila soti kutang’isha ushamwali wa banja yanu na Mulungu mwa kulaŵila za yove “mukankhala pansi mu ng’anda mwanu, poyenda pa mseu, polala, na pouka.” (Deuteronomo 6:6, 7) Muwamila kunkhala n’nga ni Yoswa amene elaŵila kuti: “Koma neo na amung’anda mwangu, titumikile Yehova.”—Yoswa 24:15

ZAMUNGACITE:

• Nkhalani na pulogalamu yonkhazikika yosambizhya yamene ingakuyavyeni kuziŵa zosoŵa za banja yanu