GAWO 8
Matamano Akatatika
“Pacikomo camene ici, musangalala ngako nangu kuti pakali pano n’koyenela kuti muvutike kwa kanthawi cikomo ca mayeselo osiyana-siyana yokucitishani cisoni.”—1 Petulo 1:6
Nangu kuti mupanga kuyesa-yesa kuti munkhale na Ukwati koma soti banja yotemwa, vinthu vosayembekezeleka vingacitike vamene vingakupangisheni kuti cinkhale covuta kuti muŵe osangalala. (Mlaliki 9:11) Mwacinthemwa Mulungu otiyavya keno takumana na matamano. Keno museŵenzesha mfundo za m’malembo zili pansi apa, mweo na banja yanu mukokwanisha kulimbana na matamano, nangu kuti yaŵe yakulu tyani.
1 CETEKELANI YEHOVA
ZAYULAŴILA BAIBOLO: “Mutulileni nkhawa zanu zonse, pakuti yove okucitilani nkhawa.” (1 Petulo 5:7) Mukokumbukila nsita zonse kuti mayeselo yamukumana nayo yocokela lini kwa Mulungu. (Yakobo 1:13) Keno muvwendela pafupi, yove akuyavyeni kuti mukoyenda m’njila yoyenela. (Yesaya 41:10) “Mukhutulileni zili m’mtima mwanu.”—Salimo 62:8.
Kuŵelenga nosambila Baibolo nsiku zonse kukuyavyeni soti kuti munkhazike mtima pansi. Mukacita tetyo muone mwamene Yehova “onkhazikila mitima yasu keno takumana na mayeselo.” (2 Akorinto 1:3, 4; Aroma 15:4) Yove olonjeza kuti akupeni “mtendele wa Mulungu wamene upula kulingilila kulikonse.”—Afilipi 4:6, 7, 13.
ZAMUNGACITE:
-
Lombani kwaYehova kuti akuyavyeni kuŵa odekha na olingilila luweme
-
Onani zonse zamupangwa kucita nipo sankhani zamwaona kuti zili luweme
2 SAMALILANI UMOYO WANU NA WA BANJA YANU
ZAYULAŴILA BAIBOLO: “Mtima wa munthu womvwisha zinthu uziŵa zinthu, nipo kwatu ya munthu wanzelu yufuna kuziŵa zinthu.” (Miyambo 18:15) Mvwishilani mfundo zonse. Onani zakufunikila aliyense m’banja. Laŵilani nao nipo mvwishilani zakulaŵila.—Miyambo 20:5.
Tyani keno wotemweka wanu wamwalila? Musayope kuonesha cisoni canu. Kumbukilani kuti nangu “Yesu elila.” (Yohane 11:35; Mlaliki 3:4) Kupumula na kulala mokwanila n’kofunika ngako. (Mlaliki 4:6) Kucita izi kungakuyavyeni kuti mukwanishe kulimbana na vuto yukuvutishani malingililo.
ZAMUNGACITE:
-
Matamano akaliyotatika, nkhalani na ciyoŵelezi colaŵizhyana na am’banja mwanu. Kucita zamene izi kungaŵayavye kuti akolaŵila namwe momasuka matamano yakatatika
-
Mungauzhyeko ayambine ekumanako na vuto yolingana na yamene iyo
3 PEZANI THANDIZO YOFUNIKA
ZAYULAŴILA BAIBOLO: “Shamwali wene-wene ni ula wotemwa nthawi zonse nipo yove ni mkwasu evyalikila kuti akuyavye pankhala matamano.” (Miyambo 17:17) Ayanu angapangwe kukuyavyani koma angaziŵe lini zamufuna. Tetyo osaleka kuŵauzhya zamufuna. (Miyambo 12:25) Koma soti pezani thandizo ya kuuzimu kwa ŵala amene ni akulu mwauzimu. Malango a m’Baibolo yangakuuzhyeni yangaŵe yokuyavyani.—Yakobo 5:14.
Keno nsita zonse mukatizhyana na ŵanthu ocetekela Mulungu na odalila malonjezo ŵake, mufwange thandizo yamupangwa. Keno muyavya ŵanthu ayakine ofuna kuŵalimbikisha mukonkhazikishiwa mtima pansi. Ŵauzhyeni za cicetekelo canu pa Yehova na malonjezo ŵake. Nkhalani na nthina yoyavya ŵanthu ayakine ofuna thandizo. Tetyo muwamila lini kulipatula kuli ŵanthu okutemwani koma soti osamala za mweo.— Miyambo 18:1; 1 Akorinto 15:58.
ZAMUNGACITE:
-
Fotokozelani muyanu wa pa mtima nipo londelani thandizo yangakupeni
-
Nkhalani oona mtima nipo osapita m’mbali polaŵila za thandizo yamupangwa
