Kuvyalika kwa mwana kungaŵe kotemwesha koma soti koŵeŵesha. Mukankhala makolo, mungadabwe kuona kuti mutaila nsita yanu ikulu koma soti mphamvu posamalila mwana wanu. Kuyona mosakwanila pamo na kucinja kwa malingililo kungacitishe kuti cikwati canu cisayende luweme. Mweo pamo na muyanu muwamila kucinja mbali ziyakine kuti mukosamalila mwana wanu nocinjilizhya ukwati wanu. Ko malangizo a m’Baibolo angakuyavyeni tyani mwamungacitile na matamano amene aya?

ZAYULAŴILA BAIBOLO: “Cinthemwa ni coleza mtima, ni ciweme mtima, cusamala lini zofuna zake zeka nipo cukalipa lini.” (1 Akorinto 13:4, 5) Pofwana kuti lomba muli na mwana, n’zosadabwisa kuti malingililo yanu yonse yakonkhala pa mwana wanu. Mulume wanu angatatike kuziwona monga mum’samalila lini, tetyo muwamila lini kuluŵa kuti naye opangwa samalo yanu. Koma moleza mtima pamo na kumuwamila mtima, mungamuyavye kuti akozimvwa kuti niwofunika nipo naye ali na mbali pa kusamalila mwana.

“Mweo azilume . . . pitilizhyani kunkhala nao moŵaziŵa luweme” (1 Petulo 3:7) Muwamila kumvwisha kuti lomba mkazi wanu akotaila mphamvu zake zinyinji pa kusamalila mwana wanu. Pakuti yove lomba ali na maudindo ayakine amene payakine angamucitishe kunkhala na nkhawa, kumvwa kuŵeŵa koma soti kunkhala osatemwa. Nsita ziyakine angafwike na pakukukalipilani, koma yesa-yesani kusakalipa kamangu cikomo cakuti “Munthu wosakalipa kamangu ni muweme kupula munthu wamphamvu.” (Miyambo 16:32) Nkhalani wozindikila nipo muyavyeni pavinthu vakufunikila—Miyambo 14:29.

ZAMUNGACITE:

• Atata: Mukoyavya mkazi wanu kusamalila mwana, na usiku kumo. Mukocefyako nthawi yamuseŵenzeshela pa vinthu viyakine kuti monkhala na nsita yotandala na mkazi wanu koma soti na mwana wanu

• Amama: keno mulume wanu okusengani kuti akuyavyeni kusamalila mwana, muwamila lini kumulesha. Keno yove ocita lini luweme nchito yamene iyi musam’kalipile. M’malo mwake muwamila kumutembezhya nomuonesha mwangacitile

ZAYULAŴILA BAIBOLO: “Ŵeve akaŵe muŵili umo.” (Genesis 2:24) Nangu kuti m’banja mwanu muli mwana lomba, mukokumbukila kuti mweo na muyanu wam’cikwati mukali “muŵili umo.” Mukocita ciliconse camungacite kuti mukotang’isha cikwati canu.

Anakazi, mukotembezhya zakucita analume ŵanu pa thandizo yakukupani. Malizu ŵanu otembezhya angaŵe “ocizhya.” (Miyambo 12:18) Analume, ŵauzhyeni anakazi ŵanu kuti muŵatemwa ngako, na kuti muŵaona kuti ni ofunika ngako. M’tembezhyeni mwakusamalila banja.— Miyambo 31:10, 28.

“Aliyense osati akongozifunila zopindulisha yove yeka, koma na zamuyake.” (1 Akorinto 10:24) Nsita zonse mukom’citila vinthu viweme muyanu wam’cikwati. Monga ŵanthu olungulana, mukonkhala na nsita yolaŵizhyana. Muwamila kutembezhya zakucita muyanu, nomvwishila malingililo a muyanu. Pankhani yokhuza Kulalana muwamila lini kuleshana. Lingililani zofuna za muyanu. Baibolo yunena kuti: “Musaleshane kucosapo keno mwakatizhyana kuti mulekezhye kulalana.” (1 Akorinto 7:3-5) Tetyo monse mwaŵili mukolaŵizhyana pa ciliconse moona mtima. Kuleza mtima pamo na kumvwisha zinthu kungakuyavyeni kutang’isha ukwati wanu.

ZAMUNGACITE:

• Mukooneshesha kuti mupeza nthawi yotandala na muyanu wam’cikwati

• Mukocitako tunthu tungacitishe muyanu kuzimvwa kuti mum’temwa, monga kumuletelako ka mphaso olo kumulembelako kauthenga

ZAYULAŴILA BAIBOLO: Kutatikila pawenze lucece waziŵa malembo atuŵa yamene yangakupe nzelu zokuyavya kuti ukapuzumuke (2 Timoteyo 3:15) Laŵizhyanani zati mukocita kuti mukosambizhya mwana wanu. Angasambile nangu akali m’mala. Akaliyovyalika, mwana wanu angaziŵe lizu yanu nokhuziwa na mwamuvwila. Muŵelengeleni mwana wanu nangu kuti akali lucece. Nangu kuti angamvwishe lini zamuŵelenga, zamene izi zingamuyavye kuti akotemwa kuŵelenga akakula.

Nangu kuti mwana wanu ni mtontho, angomvwishila keno mulaŵila na Mulungu. Simikizhyilani kuti mwana wanu aokumvwani pamulaŵila na Yehova mulombelo. (Deuteronomo 11:19) Posoŵela, laŵilani za vinthu vecilenga Mulungu. (Salimo 78:3, 4) Paakukula mwana wanu, akozindikila kuti mutemwa Yehova nipo naye atatike kumutemwa.

ZAMUNGACITE:

• Mukolomba kwa Yehova kuti akupeni nzelu mwamungalelele mwana wanu

• Kuti mwana wanu asambile zinthu kamangu, mukowelezhya malizu amene ali na mfundo zikulu