Pecipanga makonzelo abanja, Yehova ecipa makolo udindo wosamalila ŵana ŵao. (Akolose 3:20) Tetyo ni udindo wanu makolo kusambizyha ŵana ŵanu kuti akule luweme na kuti akotemwa Yehova. (2 Timoteyo 1:5; 3:15) Muwamila soti kuziŵa zili mumtima wa mwana wanu. Kuyangizhyila apo, muwamila kuŵa coonelapo ciweme. Kuti mum’sambizhye luweme mwana ŵanu malizu a Yehova, muwamila kuŵaziŵa pamtima panu cotatika.—Salimo 40:8.

ZAYULAŴILA BAIBOLO: “Nkhalani akumvwa kamangu, ocelwa polaŵila.” (Yakobo 1:19) Mosapenekela mupangwa kuti ŵana ŵanu okolaŵila namwe momasuka. Owamila kuziŵa kuti nimwe okonzeka kumvwishila keno opangwa kulaŵila namwe. Nkhalani amtendele kuti ŵana ŵanu akwanishe kufotokoza zili mumtima mwao. (Yakobo 3:18) Keno ŵana olingilila kuti muŵakalipile oIo kuŵapeza zifukwa, angamasuke lini namwe. Nkhalani oleza mtima na ŵana ŵanu, nipo nsita zonse mukoonesha kuti muŵatemwa.—Mateyu 3:17; 1 Akorinto 8:1.

ZAMUNGACITE:

• Mukomvwishila keno ŵana ŵanu olaŵila namwe

• Mukolaŵizhyana na ŵana ŵanu nsita zonse osati tyala keno pali zovuta

ZAYULAŴILA BAIBOLO: “Munthu oonesha kuzindikila pa zinthu ofwanga ziweme.” (Miyambo 16:20) Nsita ziyake mungafunikile kumvwishila luweme malizu a ŵana ŵanu kuti muziŵe mwakumvwila. Nsita zinyinji, ŵana okondoyangizhyila malizu polaŵila keno kulaŵila zinthu zosiyana na zakupangwa kulaŵila. “Aliyense oyankhila nkhani akaliyoimvwisha luweme ni wopusa.” (Miyambo 18:13) Osafulumila kukalipa.—Miyambo 19:11.

ZAMUNGACITE:

• Nangu kuti ŵana ŵanu alaŵile zotyani, onesheshani kuti musaŵatende malizu, nipo musakalipe ngako

• Mukokumbukila mwemwenzomvwila na zinthu zemwenzoona kuti ni zofunika pemwenze pa msinkhu walipo ŵeve

ZAYULAŴILA BAIBOLO: “Mwana wangu mvwishila malango ŵauso, nipo usasiye malamulo ŵanyoko.” (Miyambo 1:8) Yehova epasa atata na amama udindo wolela ŵana. Muwamila kusambizhya ŵana ŵanu kuti okokucinzikani nokumvwilani. (Aefeso 6:1-3) Ŵana angaziŵe keno avyazi ŵao ali lini “okatizhyana m’malingililo.” (1 Akorinto 1:10) Tetyo keno mwasiyana malingililo muwamila lini kukangana pali ŵana ŵanu, cikomo cakuti angaleke kum’cinzikani.

ZAMUNGACITE:

• Muwamila kulaŵizhyana nokatizhyana mwamungalangizile ŵana wanu

• Mukasiyana malingililo na muyanu wam’cikwati pa nkhani yolangiza ŵana, mukoyesa-yesa kumvwishila malingililo ŵa muyanu

ZAYULAŴILA BAIBOLO: “Sambizhyani mwana m’njila yomuyenelela.” (Miyambo 22:6) Kusambizhya luweme ŵana kucitika lini mwangozi. Tetyo muwamila kunkhala na pulogilamu yosambizhya ŵana ŵanu. Izi zingayangizhyilepo kuŵalanga. (Salimo 127:4; Miyambo 29:17) Kulangiza kutanthauza lini tyala kutwala cilango, koma kuyangizhyilapo kuyavya ŵana ŵanu kuti amvwishe cikomo cake owamila kumvwila malamulo. (Miyambo 28:7) Muwamila soti kuŵasambizhya kutemwa Malizu a Yehova nomvwisha mfundo zake. (Salimo 1:2) Zamene izi zingayavye ŵana ŵanu kuti ankhale na cikumbumtima ciweme.—Aheberi 5:14.

ZAMUNGACITE:

• Yesa-yesani kuyavya ŵana ŵanu kuti akoona Mulungu kuŵa munthu ngaye-ngaye, wakuwamila kucetekela

• Ŵayavyeni kuti okokwanisha kuziŵa zinthu ziyakine ziipa zakuwamila kulewa, n’nga zupezeka pa malo otandalila apa intaneti. Asambizhyeni kuti okolewa ŵanthu olala ŵana atontho