Tonse tufunikila ndalama kuti tisamalile zosoŵa za mabanja ŵasu. (Miyambo 30:8) Nipo “ndalama zucinjilizhya” (Mlaliki 7:12) Monga ŵanthu olungulana, nsita ziyake zingankhale zovuta kulaŵizhyana nkhani zokhuza ndalama. Koma musalole ndalama kucitisha matamano mu ukwati wanu. (Aefeso 4:32) Ŵanthu olungulana owamila kucetekelana nopangila pamo zosankha zokhuza moseŵenzeshela ndalama.

ZAYULAŴILA BAIBOLO: “Niŵani wa mweo opangwa kumanga nsanja amene oyamba lini wankhala pansi noŵelengela ndalama zati aceneke, kuti aone keno ali na ndalama zokwanila kusilizhyila nsanja yamene iyo?” (Luka 14:28) Mungacite luweme kunkhala pamo noona mwamungaseŵenzeshele ndalama. (Amosi 3:3) Sankhani zinthu zamuwamila kugula nipo muone ndalama zamungaseŵenzeshe. (Miyambo 31:16) Kunkhala na ndalama zokwanila kugulila cinthu ciyakine kutanthauza lini kuti muwamila kugula cinthu ciliconse. Yesa-yesani kulewa nkhongole nipo seŵenzeshani tyala ndalama zamulinazo.—Miyambo 21:5; 22:7.

ZAMUNGACITE:

• Keno mwasalako na ndalama kosilizhyila kwa mwezi laŵizhyanani mwamungaziseŵenzeshele

• Keno muli na ndalama zitontho, muwamila kucefya vamungagule. Coonelapo, m’malo mogula vakulya vopika kale mungacite luweme kupika mweka

ZAYULAŴILA BAIBOLO: “Samalilani zinthu zonse moona mtima, nipo citani zamene izi osati pamenso pa Yehova tyala, koma na pa menso pa ŵanthu.” (2 Akorinto 8:21) Nkhalani wocetekeleka kumuyanu wam’cikwati pankhani yokhuza ndalama zamupeza na zamuseŵenzesha.

Nthawi zonse m’kokonshana na muyanu popanga zosankha zikulu-zikulu zokhuza ndalama. (Miyambo 13:10) Kulaŵizhyana pa nkhani zokhuza ndalama kungakuyavyeni ngako kuti muŵe na mtendele mu ukwati wanu. Mukoona ndalama zamufwanga kuŵa za banja osati zanu mweka.—1 Timoteyo 5:8.

ZAMUNGACITE:

• Katizhyanani kuti ni ndalama zingani zangaseŵenzeshe aliyense wa mweo cosakonsha muyake

• Muwamila lini kulaŵizhyana tyala za ndalama keno pali matamano