Yehova opangwa kuti “tikotemwa cilungamo.” (Mika 6:8) Ici n’ciweme cikomo cakuti keno muukwati muliye cilungamo, mungaŵeve kucetekelana. Nipo kucetekelana ni kofunika ngako kuti cinthemwa cikule.

Masiku ŵano, kucetekelana kusoŵeka m’vikwati. kuti m’cinjilizhye ukwati wanu, muwamila kuyesa-yesa kucita vinthu viŵili ivi.

ZAYULAŴILA BAIBOLO: “Mukosimikizhyila kuti zinthu zofunika ngako n’zotyani.” (Afilipi 1:10) Cikwati canu ni cimo mwa zinthu zofunika ngako pa umoyo wanu. Tetyo muwamila kuciona kuŵa cinthu ca mtengo wapatali.

Yehova opangwa kuti mukosamalila muyanu wam’cikwati “notemwa na moyo” capamo. (Mlaliki 9:9) Yove olaŵila kuti, muwamila lini kusula muyanu wam’cikwati, m’malo mwake muwamila kufwanga njila zotemweshelana. (1 Akorinto 10:24) Mukocita vinthu voonesha kuti muyanu niwofunika nipo mum’temwa.

ZAMUWAMILA KUCITA:

• Onesheshani kuti mukopeza nthawi yotandalila pamo, soti mukomvwishila mosamala keno muyanu wam’cikwati olaŵila

• Mukolingililana

ZAYULAŴILA BAIBOLO: “Aliyense ololeshesha munakazi mpaka nomulaka-laka wacita naye kale ucende mumtima mwake.” (Mateyu 5:28) Keno munthu ongonkhalila kulingilila za ciwelewele, m’malizu ayakine tingalaŵile kuti ni wosacetekeleka ku muyake wam’cikwati.

Yehova olaŵila kuti muwamila “kucinjilizhya mtima wanu.” (Miyambo 4:23; Yeremiya 17:9) Kuti mucite zamene izi, muwamila kucinjilizhya menso ŵanu. (Mateyu 5:29, 30) Mukocita n’nga ni Yobu, amene ecita pangano na menso yake kuti asaloleshe munakazi momukumbwila. (Yobu 31:1) Yesa-yesani kulewa vithunzi-thunzi vuonesha cinthaku. Nipo lewani kukopana na munthu asali mulume keno mkazi wanu.

ZAMUNGACITE:

• Vocita vanu vukoonesha ku ŵanthu kuti mutemwana ngako na muyanu wa m’cikwati

• Lingililani mwakumvwila muyanu wam’cikwati, nipo lekani kutandala namunthu aliyense amene angacitishe muyanu wam’cikwati kunkhala wosatemwa