Baibolo yufotokoza magulu aŵili ya analume Acikhilisitu amene ali na maudindo mu mpingo—“oyanganila na atumiki oyavya.” (Afilipi 1:1) Nthawi zinyinji ponkhala akwasu oŵelengeka amene otumikila pa mpingo ulionse. Ko atumiki oyavya okata nchito yanji cifukwa ca ubwino wasu?

Oyavya bungwe ya akulu. Atumiki oyavya ni analume auzimu, odalilika koma soti acangu pa nchito yao. Ayakine ni acilumbwana nipo ayakine ni akulukazi. Okata nchito zosiyana-siyana zokhuza kayendedwe ka gulu zamene zufunika pa mpingo. Izi zupasa akulu mpata wosamalila maudindo yao yophunzisa na uciŵeta.

Okata nchito zofunika. Atumiki oyavya ayakine onkhala akalinde nipo nchito yao ni kulondela ŵanthu onse owela pa misonkhano. Ayakine osamalila zokuzhyila malizu, oyaŵila mabuku, osamalila maakaunti nipo oyaŵila magawo olalikila kuli akwasu na azilongosi. Oyavya soti pa nchito yowamya Ng’anda ya Ufumu. Akulu angasenge atumiki oyavya kuti asamalile akulukazi. Atumiki oyavya ni okonzeka kukata nchito iliyonse yaangapasiwe, nipo mpingo uŵalemekeza cifukwa ca nthina yao na mtima wao wofuna kutumikila ayakine.—1 Timoteyo 3:13.

Oonesha cisanzo ciweme n’nga analume Acikhilisitu. Atumiki oyavya osankhiwa cifukwa ca minkhalidwe yao yauzimu. Nkhani zao pa misonkhano zutang’isha cikhulupililo casu. Ove otangulila pa nchito yolalikila nipo cisanzo cao cuyangizhyila cangu casu. Cifukwa ca mzimu wao wokatizhyana na bungwe ya akulu, olimbikisha cimwemwe na umozi pa mpingo. (Aefeso 4:16) M’kuluta kwa nthawi, nao angayenelele kunkhala akulu.

• Kansi atumiki oyavya ni analume otyani?

• Ko atumiki oyavya okata nchito zotyani kuti zinthu zikoyenda luweme pa mpingo?