Kwa vyaka vinyinji, Mboni za Yehova zenzoseŵenzesha ma Baibolo osiyana-siyana. Zenzosindikizhya soti ma Baibolo ayakine noŵafalisa. Koma teona kuti penzofunika Baibolo yomasuliliwa luweme kuti iyavye ŵanthu “kuziŵa cendi molondola,” camene niye cifunilo ca Mulungu ku ŵanthu onse. (1 Timoteyo 2:3, 4) Tetyo, mu 1950 teyamba kufalisa mbali za Baibolo yasu yoitiwa kuti Baibulo la Dziko Latsopano m’cilaŵilo calomba. Pali pano Baibolo yamene iyi yamasuliliwa mokhulupilika koma soti molondola m’vilaŵilo vopitilila 120.

Penzofunika Baibolo yosavuta kumvwa. Vilaŵilo vucinja m’kuluta kwa nthawi, nipo ma Baibolo anyinji onkhala na malizu acikale amene ni ovuta kumvwa. Koma soti mipukutu yolondola yakale yamene yosiyana lini ngako na mipukutu yoyambilila yapezeka. Mipukutu yamene iyi yayavya kumvwishisha Ciheberi, Ciaramu na Cigiriki ca m’Baibolo.

Penzofunika Baibolo yamene yufotokoza malizu a Mulungu mokhulupilika. Omasulila Baibolo aliye ufulu wocinja malembo ouzhyiliwa a Mulungu. Ove owamila kukonkha mokhulupilika zelembewa m’mipukutu yoyambilila. Nangu n’tetyo, omasulila anyinji oseŵenzesha lini zina ya Mulungu yakuti Yehova m’Malembo Opatulika.

Penzofunika Baibolo yamene yulemekeza Wolemba wake. (2 Samueli 23:2) M’mipukutu ya Baibolo yakale ngako, zina ya Yehova yupezeka nthawi pafupi-fupi 7,000 molingana na cisanzo cili pansi apa. Tetyo zina ya Yehova eiwezhyela soti m’malo ŵake onse mu Baibulo la Dziko Latsopano. (Salimo 83:18) Baibolo yamene iyi yumvwika luweme kuŵelenga cifukwa yufotokoza luweme malingililo a Mulungu. Izi zili tetyo cifukwa cakuti kwa vyaka vinyinji pecitika nchito ikulu yosakila-sakila maumboni osiyana-siyana. Keno muli na Baibulo la Dziko Latsopano olo muliye, tukulimbikishani kunkhala na ciyoŵelezi coŵelenga Malizu a Yehova siku iliyonse.—Yoswa 1:8; Salimo 1:2, 3.

• Ndaŵa yanji teona kuti penzofunika Baibolo yomasuliliwa m’njila yalomba?

• Ko ni ciyoŵelezi cotyani cakufunikila kunkhala naco munthu kuti aphunzile cifunilo ca Mulungu?