Baibolo yelaŵililatu kuti pavuli pa imfwa ya Khilisitu, pakankhale aphunzisi awenye pakati pa Akhilisitu oyambilila nipo akapotoze cendi ca m’Baibolo. (Machitidwe 20:29, 30) M’kuluta kwa nthawi, zamene izi zecitika cendi. Ove eyavizhya ziphunziso za Yesu na viphunziso vacikunja, nipo Cikhilisitu cawenye ceyamba. (2 Timoteyo 4:3, 4) Kansi tingaziŵe tyani kuti zatukhulupilila masiku ŵano niye zayuphunzisa cendi Baibolo?

Nthawi yefwika yakuti Yehova avumbule cendi. Yove elaŵililatu kuti mu ‘nthawi yosilizhya, ŵanthu akaziŵe zinthu zinyinji zacendi.’ (Danieli 12:4) Mu 1870, kagulu ka ŵanthu enzosakila-sakila cendi ezindikila kuti ziphunziso za m’machechi anyinji zenze lini za m’Malembo. Tetyo ove eyamba kusakila-sakila cendi ca m’Baibolo kuti apeze ziphunziso zake zene-zene, nipo Yehova eŵadalisa na ciziŵiso pa zinthu zauzimu.

Analume olitwala ephunzila Baibolo mosamala. Ophunzila Baibolo anthina amene ao, amene enzepo seo tikaliyovyalika, epeza njila yophunzilila Baibolo yatuseŵenzesha mpaka lelo. Ove enzotola nkhani imozi-imozi m’Baibolo nolaŵizhyana. Akafwana lembo yovuta kumvwisha m’Baibolo, enzoona malembo ayakine ofotokoza lembo yamene iyo. Akafwana mfundo yokatizhyana na Malembo onse, enzoilemba. Mwa kulola Baibolo kuti ifotokoze yeka, ove efwana cendi cokhuza zina ya Mulungu na Ufumu wake, colinga cake pa ŵanthu na calo capansi, m’nkhalidwe wa akufwa na ciyembekezo ca ciukililo. Zecipeza zeŵamasula ku zikhulupililo na miyambo inyinji yawenye.—Yohane 8:31, 32.

Pofwika mu 1879, ophunzila Baibolo ezindikila kuti yenze nthawi yakuti afalise cendi. Tetyo, caka camene ico eyamba kufalisa magazini ya Nsanja ya Olonda Yolengeza Ufumu wa Yehova, yatufalisa mpaka lelo. Masiku ŵano, tuuzhya ŵanthu cendi ca m’Baibolo m’vyalo vokwanila 240 na m’vilaŵilo vokwanila 750. Kuyambila kale, ziliyocitikepo kuziŵa zinthu zacendi zinyinji tetyo!

• Pavuli pa imfwa ya Khilisitu, n’cinji cecitikila cendi ca m’Baibolo?

• Ko n’cinji catiyavya kupeza soti cendi ca m’Malizu a Mulungu?