Pa Ciheberi, zina yakuti Beteli yutanthauza “Ng’anda ya Mulungu.” (Genesis 28:17, 19) Yamene iyi ni zina yoyenelela ya malo amene Mboni za Yehova zankhazikisha pacalo conse. Ku malo amene aya niye kwakuyanganila nocilikiza nchito yolalikila. Bungwe Yolamulila ili ku malikulu a pacalo conse ku New York State, U.S.A., nipo yuyanganila maofesi a msambo m’vyalo vosiyana-siyana. Ŵanthu otumikila ku malo amene aŵa oitiwa kuti banja ya Beteli. N’nga banja, onkhalila pamo, oseŵenzela pamo, olyela pamo nophunzila Baibolo pamo.—Salimo 133:1.

Malo apadela kwamene onse m’banja ali na mzimu wolitwala. Beteli iliyonse ili na analume na anakazi Acikhilisitu amene ni olitwala pocita cifunilo ca Mulungu nipo ocilikiza zinthu za Ufumu nthawi zonse. (Mateyu 6:33) Paliye olondela malipilo alionse, koma onse opasiwa malo onkhala, cakulya na alawansi yoŵayavya pa zinthu zakufunikila aliyense payeka. Aliyense pa Beteli ali na nchito yake. Ayakine oseŵenzela mu ofesi, mu khichini olo mu cipinda colyela. Ayakine oseŵenzela kosindikizhyila mabuku keno koikila vikuto. Ayakine opyela m’vipinda volala, owasha, okata nchito yokonza zinthu olo nchito ziyakine.

Kucitika nchito zinyinji zocilikiza nchito yolalikila za Ufumu. Colinga cikulu ca Beteli ni kufalisa cendi ca m’Baibolo ku ŵanthu anyinji. Cisanzo cake ni kabuku kano. Bungwe Yolamulila niye yeyanganila nchito yolemba kabuku kano, kukatumizhya pa kompyuta kwa omasulila pacalo conse, kukasindikizhya pa makina ofulumila ngako ku ng’anda za Beteli zosiyana-siyana nokatumizhya ku mipingo yopitilila pa 110,000. Pa zocitika zonse izi, mabanja a Beteli ocilikiza nchito yofunika ngako pa nchito zonse yamene ni kulalikila uthenga uweme.—Maliko 13:10.

• Ko ni ŵani otumikila pa Beteli, nipo osamaliliwa tyani?

• Kansi Beteli iliyonse yucilikiza nchito yofunika ngako yotyani?