Kanyinji-kanyinji lizu yakuti “mpainiya” yulaŵila za munthu opeza malo yalomba nosegulila ayakine njila kuti akonkhe. Yesu enze n’nga ni mpainiya cifukwa etumizhyiwa pacalo kuzokata nchito yopasa moyo nosegula njila ya cipulumuso. (Mateyu 20:28) Masiku ŵano, okonkha ŵake otolela cisanzo cake mwa kuseŵenza nthawi ikulu pa nchito yopanga ophunzila. (Mateyu 28:19, 20) Ayakine okata nchito yamene yuitiwa kuti utumiki wa upainiya.

Mpainiya ni munthu amene nchito yake ni kulalikila. A Mboni za Yehova onse olalikila uthenga uweme. Koma ayakine acinja zinthu pa umoyo wao kuti ankhale apainiya a nthawi zonse, nipo oseŵenza ma awala 70 mwezi ulionse pa nchito yolalikila. Kuti akwanishe kucita zamene izi, anyinji opeza nchito ya ma awala atontho. Ayakine osankhiwa kunkhala apainiya apadela kuti akatumikile kumalo kufunika anchito anyinji. Olalikila ma awala 130 olo kupitililapo mwezi ulionse. Apainiya okhutila na moyo wosafuna zinyinji, nipo odalila Yehova kuti aŵapase zosoŵa zao. (Mateyu 6:31-33; 1 Timoteyo 6:6-8) Ŵala amene angakwanishe lini kucita upainiya wa nthawi zonse, angankhale apainiya oyavya keno angakwanishe. Amene aŵa angayangizhyile nchito yao yolalikila kuti akwanishe ma awala 30 olo 50 pa mwezi.

Mpainiya okonda Mulungu na ŵanthu. Monga Yesu, tuzindikila kuti ŵanthu anyinji masiku ŵano ali na njala yauzimu. (Maliko 6:34) Koma seo tili na uthenga uweme wamene ungaŵayavye noŵapasa ciyembekezo cotang’a ca msogolo. Mpainiya oseŵenzesha nthawi yake na mphamvu zake zonse poyavya ayakine mwauzimu cifukwa ca cikondi. (Mateyu 22:39; 1 Atesalonika 2:8) Zofumapo zake n’zakuti, cikhulupililo ca mpainiya cunkhala cotang’a nipo ovwendela pafupi na Mulungu, koma soti onkhala na cimwemwe cikulu.—Machitidwe 20:35.

• Mwa mungalaŵile kuti mpainiya ni ŵani?

• Ndaŵa yanji ayakine ocita upainiya wa nthawi zonse?