Pa nthawi yakuti wasala patontho kufwa, Yesu elaŵizhyana na ophunzila ŵake okwanila 4 kumbali. Mazina ŵao ni Petulo, Yakobo, Yohane na Andireya. Yesu penzofotokoza za cizindikilo ca kunkhalapo kwake m’masiku osilizhya, ekonsha konsho yofunika ngako yakuti: “Ni ŵani kwene-kwene amene ali kapolo wokhulupilika na wanzelu amene asikulu wake emuika kuti akoyanganila anchito ŵake apamlyango, noŵapasa cakulya pa nthawi yoyenela?” (Mateyu 24:3, 45; Maliko 13:3, 4) Yesu enzosimikizhyila ophunzila ŵake kuti yove monga “asikulu” ŵao, akasankhe ŵanthu ati akoyaŵila cakulya cauzimu kuli okonkha ŵake nthawi yosilizhya. Mwa kapolo wamene uyu ni ŵani?

Ni kagulu katontho ka Akhilisitu ozozewa. “Kapolo” wamene uyu ni Bungwe Yolamulila ya Mboni za Yehova. Bungwe Yolamulila yutwala cakulya cauzimu kuli olambila a Yehova. Tudalila gulu ya kapolo wokhulupilika yamene iyi kutipasa “cakulya cokwanila pa nthawi yake.”—Luka 12:42.

Oyanganila ng’anda ya Mulungu. (1 Timoteyo 3:15) Yesu epasa gulu ya kapolo udindo ukulu woyanganila nchito ya pacalo ya gulu ya Yehova, n’nga kusamalila cuma cake, kusogolela nchito yolalikila notiphunzisa kupitila m’mipingo yasu. Tetyo, kuti “kapolo wokhulupilika na wanzelu” atipase zofunikila pa nthawi yake, oyaŵila cakulya cauzimu kupitila mu zofalisa zatuseŵenzesha mu ulaliki, koma soti kupitila m’misonkhano yasu ya mpingo na misonkhano ikulu.

Kapolo wamene uyu ni wokhulupilika pa nkhani yokonkha cendi ca m’Baibolo na pa nchito yecipasiwa yolalikila uthenga uweme, nipo ni wanzelu cifukwa oziŵa kusamalila zinthu za Khilisitu pacalo. (Machitidwe 10:42) Yehova odalisa nchito ya kapolo. Umboni wa zamene izi ni kupaka kwa cakulya cauzimu na kuyangizhyilika kwa ŵanthu mu gulu ya Mulungu.—Yesaya 60:22; 65:13.

• Kansi Yesu esankha ŵani kuti akoyaŵila cakulya cauzimu kuli ophunzila ŵake?

• Ko gulu ya kapolo ni yanzelu koma soti yokhulupilika m’njila zotyani?