Kansi mwaviona vithunzi-thunzi vili m’kabuku kano voonesha mwazuvwalila luweme Mboni za Yehova pa misonkhano yao? Ndaŵanji tusamala kavwalidwe kasu na maonekedwe yasu?

Tufuna kulemekeza Mulungu wasu. N’cendi kuti Mulungu oona zinyinji osati tyala maonekedwe ŵasu. (1 Samueli 16:7) Koma patusonkhana kuti timulambile, tufuna kulemekeza yove na olambila ayasu. Keno tingankhale na shuko ya kuyoonekela kwa pulezidenti, tingasamale maonekedwe ŵasu polingilila za udindo wake. Tetyo, maonekedwe ŵasu pa misonkhano oonesha kuti tulemekeza “Woweluza wa calo conse,” Yehova Mulungu na malo ŵasu olambilila.—Genesis 18:25.

Tufuna kuonesha mfundo zatukonkha pa umoyo wasu. Baibolo yulimbikisha Akhilisitu kuvwala “mwaulemu koma soti mwanzelu” (1 Timoteyo 2:9, 10) Kuvwala “mwaulemu” kutanthauza kulewa kavwalidwe kozioneshela, kocitisha cilako-lako olo kuvwala zoonesha muŵili. Nipo ‘nzelu’ yutiyavya kusankha vovwala viweme osati votailila keno va masitaelo opitilila malile. Mfundo zamene izi zupasa munthu ufulu wosankha vovwala vosiyana-siyana. Maonekedwe ŵasu aweme ‘angawamishe ciphunziso ca Mpulumusi wasu’ na ‘kutamanda Mulungu’ paliye malizu. (Tito 2:10; 1 Petulo 2:12) Kuvwala kwasu luweme pa misonkhano kungayavye ayakine kunkhala na malingililo oyenela polambila Yehova.

Musalole kuti kavwalidwe kanu kakukangisheni kuwela ku Ng’anda ya Ufumu. Kavwalidwe koyenelela kotanthauza lini kuvwala vovwala vodula olo va mafashoni apalulu, koma kuvwala vituŵa na vooneka luweme.

• Ndaŵa yanji kavwalidwe kasu polambila Mulungu ni nkhani ikulu?

• Kansi ni mfundo zotyani zingayavye pa nkhani ya kavwalidwe na maonekedwe?