Kansi ni Mboni za Yehova zingani zamuziŵa? Ayakine a seo tunkhala pafupi na mweo, tuseŵenza namwe pamo, olo tili m’kilasi imozi na mweo. Payakine telaŵizhyanako namwe nkhani za m’Baibolo. Ko nise ŵani maka-maka, nipo ndaŵa yanji tuuzhyako ayakine zatukhulupilila?

Nise olingana na ŵanthu ayakine onse. Tekulila kosiyana-siyana nipo tili na minkhalidwe yosiyana-siyana. Kale ayakine a seo tenze m’vipembezo viyakine, nipo ayakine enzokhulupilila lini Mulungu. Koma tikaliyonkhala Mboni, seo tonse tepatula nthawi yofufuza luweme zayuphunzisa Baibolo. (Machitidwe 17:11) Tevomelezhya zetephunzila, nipo aliyense payeka esankha kulambila Yehova Mulungu.

Kuphunzila Baibolo kutipindulisha. Seo, n’nga ŵanthu ayakine onse, tukumana na mavuto nipo tulakwisa mbali ziyakine. Koma cifukwa cakuti siku na siku tuyesa-yesa kukonkha mfundo za m’Baibolo pa umoyo wasu, umoyo wasu unkhala uweme ngako. (Salimo 128:1, 2) Ici niye cifukwa ciyakine catuuzhyilako ayakine zinthu ziweme zataphunzila m’Baibolo.

Tukonkha mfundo za Mulungu. Mfundo za m’Baibolo zutiyavya kunkhala pa mtendele nonkhala aulemu, koma soti kunkhala na minkhalidwe n’nga kuona mtima na cifundo. Mfundo za m’Baibolo zamene izi zuyavya ŵanthu kunkhala na umoyo wathanzi koma soti kunkhala na nthina pa nchito, nipo zulimbikisha mkatizhyano pa banja na minkhalidwe iweme. Tukhulupilila kuti “Mulungu aliye sankho.” Tetyo nise banja ya pacalo conse ya akwasu auzimu, nipo pakati pasu paliye sankho keno mikangano yandale. Nangu kuti nise ŵanthu wamba, gulu yasu ni yapadela.—Machitidwe 4:13; 10:34, 35.

• Kansi a Mboni za Yehova olingana tyani na ŵanthu ayakine?

• Ko a Mboni aphunzila mfundo zotyani kufumila m’Baibolo?