Nangu kuti tupita mu nkhalango zoyofya olo keno kuliyekuce luweme, nthawi zonse tupezekapo pa misonkhano Yacikhilisitu. Mboni za Yehova zukumana na mavuto pa umoyo wao nipo zuŵeŵa na nchito. Koma zulova lini ku misonkhano Yacikhilisitu. Ndaŵanji?

Misonkhano yutilimbikisha. Mtumwi Paulo elaŵila kuti “tilingililane.” Apa enzolaŵila za kulingilila ŵala ŵatusonkhana nao. (Aheberi 10:24) Malizu amene aŵa otanthauza “kulingililana mosamala ngako,” m’malizu ayakine, kuziŵana luweme umo na muyake. Tetyo malizu a mtumwi Paulo amene aŵa otilimbikisha kucitila nkhaŵa ayasu. Tikayamba kuziŵana na mabanja ya Akhilisitu ayasu, tufwika poziŵa kuti ayakine a ŵeve apilila mavuto olingana na ŵasu na kuti ŵeve angatiyavye kupilila.

Kutang’isha ushamwali wasu. Ŵanthu ŵatusonkhana nao, ni ŵanthu lini ŵatuziŵana nao tyala patali-patali, koma ni ashamwali a pamtima. Nthawi ziyakine, tunkhala na nthawi yotandalila pamo. Ko kutandalila pamo kuli na ubwino wanji? Kutandalila pamo kwamene uku kutiyavya kuona kuti tonse nise ofunika, nipo zamene izi zutang’isha cikondi casu. Tetyo, ayasu akakumana na mavuto, tunkhala okonzeka kuŵayavya cifukwa nise ashamwali ŵao ŵene-ŵene. (Miyambo 17:17) Keno tutandala na ŵanthu onse a mumpingo, tuonesha kuti ‘tusamalilana molingana.’—1 Akorinto 12:25, 26.

Tukulimbikishani kusankha ŵanthu ocita cifunilo ca Mulungu kunkhala ashamwali ŵanu. Ashamwali amene aŵa mungaŵapeze pakati pa Mboni za Yehova. Musalole ciliconse kukusokonezani kukatizhyana nase.

• Mwa kukatizhyana kwasu pa misonkhano kuli na ubwino wanji?

• Kansi ni lini pamungafune kusonkhana nase kuti mutiziŵe luweme?