Ng’anda ya Ufumu iliyonse ya Mboni za Yehova yulengeza zina ituŵa ya Mulungu. Tetyo tuona kuti ni shuko kuyavya pa nchito yopyela noisamalila kuti ikooneka luweme, na kuti nchito yamene iyi ni mbali yofunika ngako pa kulambila kwasu kwacendi. Tonse tingatoleko mbali pa nchito yamene iyi.

Mungalitwale kuti mupyele pavuli pa misonkhano. Pavuli pa msonkhano, akwasu na azilongosi olitwala kupyela Ng’anda ya Ufumu patali-patali. Kamozi pa sondo, oipyela bwino-bwino. Mkulu keno mtumiki woyavya oyanganila nchito yamene iyi, nipo okonkha mndandanda wa zinthu zofunika kucita. Molingana na nchito zilipo, akwasu na azilongosi olitwala kuti apyele, akolope, kupukuta-pukuta na kuika luweme mipando. Ayakine opyela m’vimbuzi notilamo mankhwala, osuka mawindo na magilasi oziloleshelapo, otaya vinyanswa olo kupyela panja. Kamozi pa caka, ponkhala nchito ikulu yokonza malo onse. Mwa kuseŵenza nchito yamene iyi pamo na ŵana ŵasu, tuŵaphunzisa kuti akolemekeza malo ŵasu olambilila.—Mlaliki 5:1.

Mungayavye kukonza zinthu zoonongeka. Kamozi pa caka, Ng’anda ya Ufumu oiona mosamala kunja na m’kati. Molingana na zinthu zaapeza, ponkhala nchito yokonza zinthu kaŵili-kaŵili kuti holo ikooneka luweme. Zamene izi zuyavya kuti osati pakoonongeka ndalama zinyinji. (2 Mbiri 24:13; 34:10) Ng’anda ya Ufumu yaukhondo koma soti yosamalika luweme ni malo aweme kulambililamo Mulungu wasu. Mwa kukata nchito yamene iyi, tuonesha kuti tukonda Yehova na malo ŵasu olambilila. (Salimo 122:1) Zamene izi zutwala cithunzi ciweme ku ŵanthu onse a m’dela yamene iyo.—2 Akorinto 6:3.

• Ndaŵanji tuwamila lini kunyalanyaza malo ŵasu olambilila?

• Ko ponkhala makonzelo otyani kuti Ng’anda ya Ufumu ikonkhala yaukhondo?