Pakacitika soka, Mboni za Yehova zutwala thandizo kamangu-kamangu kwa akwao. Zamene izi ni umboni wakuti tili na cikondi cene-cene pakati pasu. (Yohane 13:34, 35; 1 Yohane 3:17, 18) Kansi tuŵayavya m’njila zotyani?

Tutwala ndalama. Ku Yudeya pekwepona njala ikulu, Akhilisitu oyambilila a ku Antiyokeya etumizhya ndalama kwa akwao auzimu. (Machitidwe 11:27-30) Nase tikamvwa kuti akwasu m’vyalo viyakine akumana na soka, tutumizhya ndalama kupitila mu mipingo yasu kuti ziyavye akwasu ovutika.—2 Akorinto 8:13-15.

Tutwala thandizo yofunikila. Akulu amene ali kudela kwacitika soka, osakila-sakila mkwasu na kalongosi aliyense wa mu mpingo kuti aziŵe amene alipo na kuti ali tyani. Komiti yoyanganila za cithandizo yuyendesha nchito yoyaŵila vakulya, manzi yakumwa, vovwala, malo olala na mankhwala. Mboni zinyinji zamene zili na maluso zulitwala mwa kuseŵenzesha ndalama zao kuyotwala thandizo olo kuyokonza ng’anda za akwasu na Ng’anda za Ufumu. Gulu yasu ni yokatizhyana ngako nipo taphunzila zinyinji mwa kuseŵenzela pamo. Izi zutiyavya kucitapo kanthu kamangu-kamangu pakacitika soka. Nangu kuti tuyavya ngako-ngako “akwasu na azilongosi ŵasu m’cikhulupililo,” tuyavya soti ŵanthu a vipembezo viyakine mpata ukapezeka.—Agalatiya 6:10.

Tutwala thandizo yauzimu na cilimbikiso. Ŵanthu akakumana na soka, ofunikila citonthozo cikulu. Pa nthawi yamene iyi, tupeza cilimbikiso kufumila kwa Yehova, “Mulungu wamene otitonthoza m’njila iliyonse.” (2 Akorinto 1:3, 4) Tuuzhya ŵanthu otaya mtima malonjezo a m’Baibolo noŵasimikizhyila kuti lombapano Ufumu wa Mulungu ukafumyepo masoka onse otivutisha.—Chivumbulutso 21:4.

• Ndaŵa yanji Mboni za Yehova zucitapo kanthu kamangu-kamangu pakacitika soka?

• Ko ŵanthu akumana na soka tingaŵapase citonthozo canji cauzimu?