Kuti nchito yasu yolalikila “uthenga uweme” ku “calo ciliconse, fuko iliyonse, cilaŵilo ciliconse, na mtundu ulionse” icitike luweme, tufalisa mabuku m’vilaŵilo vopitilila pa 700. (Chivumbulutso 14:6) Ko tukwanisha tyani kucita nchito ikulu yamene iyi? Tukwanisha cifukwa ca thandizo ya olemba amene ali m’vyalo vosiyana-siyana na omasulila opitilila pa 3,300. Onse amene aŵa ni Mboni za Yehova.

Nkhani zulembewa m’Cizungu. Bungwe Yolamulila yuyanganila Dipatimenti Yolemba Mabuku ku malikulu ŵasu. Dipatimenti yamene iyi yuyanganila nchito ya olemba amene ali ku malikulu na m’maofesi a msambo ayakine. Kunkhala na olemba osiyana-siyana kutiyavya kulemba nkhani za ŵanthu a zinkhalidwe zosiyana-siyana. Cifukwa ca zamene izi, mabuku ŵasu ofwika pa mtima ŵanthu a m’vyalo vosiyana-siyana.

Nkhani zikalembewa, zutumizhyiwa kwa omasulila. Pavuli pakuti nkhani yolembewa yaŵelengewa noivomelezhya, oitumizhya pa kompyuta kuli omasulila pacalo conse kuti aimasulile noona keno zaamasulila zili luweme noiŵelenga soti. Ove oyesa-yesa kusankha “malizu olondola a cendi” amene otwala tanthauzo yonse ya Cizungu m’cilaŵilo cao.—Mlaliki 12:10.

Makompyuta ofulumizhyisha nchito. Kompyuta payeka ingalembe lini nkhani noimasulila. Koma mwa kuseŵenzesha madikishonale a pa kompyuta na zinthu ziyakine zofufuzila za pa kompyuta, zuyavya kuti nchito ya olemba na omasulila icitike kamangu. Mboni za Yehova zepanga pulogilamu ya pa kompyuta yoitiwa kuti Multilanguage Electronic Publishing System (MEPS). Pulogilamu yamene iyi yuŵalola kulemba malizu m’vilaŵilo vosiyana-siyana, kuikamo vithunzi-thunzi nokonza nkhani zamene izo kuti akazisindikizhye.

Ndaŵa yanji tucita nthina teti kumasulila na m’vilaŵilo vitontho-vitontho kumo? Cifukwa ni cifunilo ca Yehova kuti “ŵanthu, kaya ankhale a mtundu wotyani, apulumuke nonkhala oziŵa cendi molondola.”—1 Timoteyo 2:3, 4.

• Ko nchito yolemba mabuku ŵasu yucitika tyani?

• Ndaŵa yanji tumasulila mabuku ŵasu m’vilaŵilo vinyinji?