Maphunzilo aumulungu ankhala cizindikilo ca Mboni za Yehova kwa nthawi itali. Atumiki a nthawi zonse olondela maphunzilo apadela yamene yoŵayavya ‘kukwanilisha mbali zonse za utumiki wao.’—2 Timoteyo 4:5.

Sukulu ya Utumiki wa Upainiya. Mpainiya amene wakwanisha caka cimozi oloŵa sukulu ya masiku 6 yamene yucitikila pa Ng’anda ya Ufumu ya kudela kwao. Colinga cake ni kuyavya apainiya kuvwendela pafupi na Yehova, kunkhala aluso m’mbali zonse za ulaliki nopitilizhya kutumikila mokhulupilika.

Sukulu ya Alengezi a Ufumu. Sukulu iyi yucitika kwa miyezi iŵili. Colinga cake ni kuphunzisa apainiya aluso amene ni okonzeka kufuma kwao na kuyotumikila ku madela kufunika anchito anyinji. Otolela cisanzo ca Mlengezi mkulu wamene enkhalako pacalo, Yesu Khilisitu nipo olaŵila kuti, “Neo nilipo! Nitumizhyeni.” (Yesaya 6:8; Yohane 7:29) Kutumikila ku madela ayakine kwamene ni kutali na kwao kungafunike kucinja nophunzila kankhalidwe ka kwamene uko. Cinkhalidwe, nyengo na vakulya vingankhale vosiyana ngako na va kwao. Pangafunikile soti kuphunzila cilaŵilo ca kwamene uko. Sukulu yamene iyi yuyavya akwasu na azilongosi amene ni mbeta koma soti ŵala ali pa banja amene ali na vyaka va pakati pa 23 mpaka 65. Sukulu yamene iyi yuŵayavya kukulisha minkhalidwe ya kuuzimu yamene ni yofunika mu utumiki wao nonkhala na maluso yamene yangaŵayavye kutumikila Yehova na gulu yake mofwikapo.

Sukulu ya Gileadi. Mu Ciheberi, malizu akuti “Gileadi” otanthauza “Mulu wa Mboni.” Kuyambila mu caka ca 1943, amishonale opitilila pa 8,000 atumizhyiwa m’vyalo vosiyana-siyana kuyocitila umboni “mpaka kosilizhyila kwa calo capansi.” Nipo pankhala zofumapo ziweme. (Machitidwe 13:47) Amishonale pecitumizhyiwa ku calo ca Peru, kwenzeve mpingo ulionse. Koma lomba kuli mipingo yopitilila pa 1,000. Amishonale peciyamba kutumikila ku Japan, kwenze Mboni zosakwanila 10. Koma lomba kuli Mboni zopitilila pa 200,000. Sukulu ya Gileadi, yamene yucitika kwa miyezi 5, yuyangizhyilapo kuphunzila Malizu a Mulungu mofwikapo. Ŵala otumikila n’nga apainiya apadela olo amishonale na ŵala ali pa ofesi ya msambo olo oyanganila oyenda-yenda niye oitiwa kuloŵa sukulu yamene iyi kuti alondele maphunzilo ofwikapo kuti ayavye nolimbikisha nchito yolalikila pacalo conse.

• Kansi colinga ca Sukulu ya Utumiki wa Upainiya ni cinji?

• Kansi ni ŵani oyenelela kuloŵa Sukulu ya Alengezi a Ufumu?