M’vyaka 100 voyambilila, kagulu katontho ka “atumwi na akulu ku Yerusalemu,” enzotumikila n’nga Bungwe Yolamulila nipo enzopanga zosankha zikulu m’malo mwa mpingo wonse wa Akhilisitu ozozewa. (Machitidwe 15:2) Kuti akatizhyane pa cosankha cimozi, enzolaŵizhyana Malembo nokonkha cisogozo ca mzimu wa Mulungu. (Machitidwe 15:25) Njila yamene iyi niye yukonkhewa masiku ŵano.

Mulungu oiseŵenzesha kucita cifunilo cake. Akwasu ozozewa amene ali mu Bungwe Yolamulila okonda ngako Malizu a Mulungu nipo oziŵa luweme moyendeshela nchito yasu koma soti kusamalila nkhani zauzimu. Onkhala na miting’i sondo iliyonse kuti alaŵizhyane zosoŵa za gulu yonse ya akwasu pacalo conse. N’nga ni mwezenzele m’vyaka 100 voyambilila, ove otwala malangizo a m’Baibolo kupitila m’makalata olo kupitila muli oyanganila oyenda-yenda na ŵanthu ayakine. Zamene izi zuyavya ŵanthu a Mulungu kunkhala na malingililo amozi nocita zinthu mokatizhyana. (Machitidwe 16:4, 5) Bungwe Yolamulila yuyanganila nchito yokonza cakulya cauzimu, yulimbikisha ŵanthu onse kuika nchito yolalikila za Ufumu pasogolo, nipo yuyanganila nchito yoika akwasu pa maudindo.

Yukonkha cisogozo ca mzimu wa Mulungu. Bungwe Yolamulila yudalila cisogozo ca Yehova, Mfumu ya Cilengedwe conse, koma soti cisogozo ca Yesu, Mutu wa mpingo. (1 Akorinto 11:3; Aefeso 5:23) Akwasu a m’Bungwe Yolamulila oziona lini kuti ni asogoleli a ŵanthu a Mulungu. Ove, pamo na ozozewa onse, “okonkha Mwanawambelele [Yesu] kulikonse kwakuya.” (Chivumbulutso 14:4) A Bungwe Yolamulila oyamikila keno tuŵapemphelela.

• Ko ni ŵani enze m’bungwe yolamulila m’vyaka 100 voyambilila?

• Kansi Bungwe Yolamulila yucita cinji kuti ifwane cisogozo ca Mulungu masiku ŵano?