Kuyambila kale, Yehova ofuna kuti mabanja onse akopeza nthawi yonkhala pamo kuti atang’ishe umoyo wao wa kuuzimu na wa banja yao. (Deuteronomo 6:6, 7) Niye cifukwa cake a Mboni za Yehova opatula nthawi yocita kulambila kwa pabanja sondo iliyonse. Olaŵizhyana momasuka nkhani za kuuzimu molingana na zosoŵa za banja yao. Nangu kuti munkhala mweka, nthawi yamene iyi ni mpata uweme wonkhala pansi na Mulungu mwa kuphunzila nkhani ya m’Baibolo yamungasankhe.

Ni nthawi yovwendela pafupi na Yehova. “Vwendelani pafupi na Mulungu nipo yove avwendele pafupi na mweo.” (Yakobo 4:8) Patuphunzila za minkhalidwe ya Yehova na zocita zake kupitila m’Malizu ŵake, tumuziŵa luweme. Njila yosavuta yoyambila kulambila kwa pabanja ni kuŵelengela pamo Baibolo mokuwa kwa maminesi oŵelengeka. Mungacite izi mwa kukonkha ndandanda ya sondo iliyonse ya Sukulu ya Ulaliki. Aliyense m’banja angapasiwe mbali yakuti aŵelenge, pavuli pake mungalaŵizhyane zamwaphunzila m’Malembo.

Ni nthawi yotang’isha kukatizhyana pa banja. Mulume na mkazi wake, koma soti makolo na ŵana, otang’isha kukatizhyana pabanja pakuphunzila Baibolo pamozi. Nthawi yamene iyi yuwamila kunkhala yosangalasha koma soti yam’tendele, yamene aliyense m’banja ofunishisha kupezekapo sondo iliyonse. Molingana na msinkhu wa ŵana, makolo angasankhe nkhani zoyavya zaangalaŵizhyane, payakine angaseŵenzeshe nkhani za mu Nsanja ya Mlonda na Galamukani! olo nkhani zopezeka pa Webusaiti yasu ya jw.org. Mungalaŵizhyane mavuto yakukumana nayo wana ŵanu ku sukulu na mwaangacitile na mavuto yamene ayo. Mungaphunzile nyimbo zati zikaimbiwe pa misonkhano nipo pavuli pake mungalyeko twakulya tuyakine.

Nthawi yapadela yamene iyi yolambila Yehova sondo iliyonse iyavye aliyense m’banja kukonda Malizu a Mulungu nipo yove adalise ngako nthina yanu.—Salimo 1:1-3.

• Ndaŵa yanji tupatula nthawi yocita kulambila kwa pabanja?

• Kansi makolo angacitenji kuti aliyense m’banja akosangalala na kulambila kwa pabanja?