Ndaŵanji vinso va aŵa ŵanthu vuoneka vacimwemwe? Ali pa umo mwa misonkhano yasu ikulu-ikulu. Kale atumiki a Mulungu elamuliwa kuti akosonkhana katatu pa caka. Nase tuyembekezela mwacidwi misonkhano ikulu-ikulu. (Deuteronomo 16:16) Caka ciliconse tunkhala na misonkhano itatu: misonkhano yadela iŵili ya siku imozi na msonkhano wacigawo wa masiku atatu. Mwa misonkhano yamene iyi yutiyavya m’njila zotyani?

Yutang’isha ukwasu Wacikhilisitu. Aisiraeli enzosangalala potamanda Yehova “pamsonkhano.” Nase tusangalala pomulambila pamo pa misonkhano yapadela. (Salimo 26:12; 111:1) Misonkhano yamene iyi yutipasa shuko yoonana notandala na Mboni zofumila ku mipingo iyambine olo ku vyalo viyambine. Mzuŵa tulyela pamo cakulya pa malo a msonkhano. Zamene izi zutang’isha mzimu wa ushamwali pa maphwando auzimu amene aŵa. (Machitidwe 2:42) Pa misonkhano yamene iyi tuzionela seka cikondi camene cukatizhyanisha “gulu yonse ya akwasu” pacalo conse.—1 Petulo 2:17.

Yutiyavya kuluta pasogolo mwauzimu. Aisiraeli epindula soti mwa ‘kumvwisha luweme malizu’ a m’Malembo yeciŵafotokozela. (Nehemiya 8:8, 12) Nase tuona kuti malangizo a m’Baibolo yatulondela pa misonkhano yasu ni yofunika ngako. Mutu wa msonkhano uliwonse ufumila m’Malembo. Tuphunzila mwatingacitile cifunilo ca Mulungu pa umoyo wasu kupitila mu nkhani zolaŵiliwa na munthu m’mozi, nkhani zosiilana na visanzo. Tulimbikishiwa tikamvwa za ayasu opilila mavuto yakukumana nayo nthawi ino yovuta cifukwa conkhala Akhilisitu. Pa msonkhano wacigawo, ponkhala masewelo yamene yotiyavya kumvwishisha nkhani za m’Baibolo notiphunzisa mfundo zofunika ngako. Pa msonkhano uliwonse ukulu, ponkhala ubatizo kwa ŵala elitwala kwa Mulungu.

• Ndaŵanji misonkhano ikulu-ikulu yunkhala nthawi yosangalasha?

• Ko mungapindule m’njila zotyani keno mupezeka pa misonkhano ikulu-ikulu?