Misonkhano ya Akhilisitu oyambilila yenzoyangizhyilapo kuimba nyimbo, kupemphela, kuŵelenga nolaŵizhyana Malembo, nipo penzonkhala lini mwambo ulionse wapadela. (1 Akorinto 14:26) Muzaone zolingana na zamene izi mukawela pa misonkhano yasu.

Malangizo ŵake ofumila m’Baibolo nipo ni oyavya. Kosilizhyila kwa sondo, mpingo ulionse usonkhana kumvwishila nkhani ya m’Baibolo ya maminesi 30. Nkhani yamene iyi yufotokoza mwatingaseŵenzeshele Malembo pa umoyo wasu koma soti zayolaŵila Malembo zokhuza nthawi yatunkhalamo. Wolaŵila nkhani pakuŵelenga Malembo, tonse tukonkha m’ma Baibolo ŵasu. Nkhani ikasila, ponkhala Phunzilo ya “Nsanja ya Mlonda” ya awala imozi, nipo onse opezekapo onkhala na ufulu woyankhapo polaŵizhyana nkhani ya mu Nsanja ya Mlonda yophunzila. Phunzilo yamene iyi yutiyavya kukonkha malangizo a m’Baibolo pa umoyo wasu. Nkhani yamene iyi yuphunziliwa m’mipingo yonse yopitilila pa 110,000 pacalo conse.

Tuyavyiwa kuyangizhyila luso yasu yophunzisa. Mkati mwa sondo, tunkhala soti na msonkhano wa mbali zitatu. Mbali yoyamba yunkhala Phunzilo ya Baibolo ya Mpingo ya maminesi 30. Iyi ni mbali ya makonsho na mayankho nipo yutiyavya kumvwishisha mfundo za m’Malembo na maulosi a m’Baibolo. Mbali yaciŵili ni Sukulu ya Utumiki ya maminesi 30. Yuyamba nolaŵizhyana macapitala a m’Baibolo yamene mpingo weŵelengelatu. Pavuli pake ophunzila amene elembesha mu sukulu olaŵila nkhani zifupi-zifupi. Mlangizi otwala uphungu wotiyavya kuyangizhyila luso yasu yoŵelenga nolaŵila nkhani. (1 Timoteyo 4:13) Mbali yosilizhyila ni Msonkhano wa Nchito wa maminesi 30. Pa msonkhano wamene uyu ponkhala nkhani, visanzo na mbali zokonsha makonsho, zamene zutiyavya kuziŵa kuphunzisa ayakine Baibolo.

Mukawela ku misonkhano yasu, tukhulupilila kuti mukasangalale na maphunzilo apalulu a m’Baibolo yati mukalondele.—Yesaya 54:13.

• Kansi mukaphunzilenji mukawela pa misonkhano ya Mboni za Yehova?

• Ko ni msonkhano wotyani wamungakonde kupezekapo?