Ŵanthu anyinji eleka kuluta ku machechi cifukwa cakuti opezako lini thandizo yauzimu keno citonthozo. Ndaŵanji muwamila kupezeka pa misonkhano ya Mboni za Yehova? Ko mukapezeko cinji kwamene uko?

Mukasangalale kunkhala na ŵanthu okondana nosamalilana. Akhilisitu a m’vyaka 100 voyambilila, enze m’mipingo yosiyana-siyana nipo enzosonkhana kuti alambile Mulungu, aphunzile Malembo nolimbikishana. (Aheberi 10:24, 25) Pofwana kuti pa misonkhano yao enzokondana, ove enzoona kuti ali pakati pa ashamwali ŵene-ŵene, akwao na azilongosi ŵao auzimu. (2 Atesalonika 1:3; 3 Yohane 14) Nase tukonkha cisanzo cao nipo tusangalala.

Ubwino wokonkha mfundo za m’Baibolo. Mu nthawi ya m’Baibolo, analume, anakazi na ŵana enzosonkhana pamo. Niye mwazilili na masiku ŵano. Aphunzisi oyenelela oseŵenzesha Baibolo kutiyavya kuzindikila mwatingaseŵenzeshele mfundo za m’Baibolo. (Deuteronomo 31:12; Nehemiya 8:8) Pa nkhani zolaŵizhyana na omvwishila na poimba nyimbo, onse onkhala na shuko yotolamo mbali. Zamene izi zutipasa shuko yofotokoza za ciyembekezo casu Cacikhilisitu.—Aheberi 10:23.

Munkhale na shuko yotang’isha cikhulupililo canu mwa Mulungu. Pa nthawi iyakine mtumwi Paulo euzhya mpingo uyakine kuti: “Nulakalaka kukuonani . . . kuti tizetang’ishane mwa cikhulupililo, canu na cangu.” (Aroma 1:11, 12) Pa misonkhano yasu tukatizhyana na akwasu auzimu nthawi zonse, nipo izi zutang’isha cikhulupililo casu na cilakolako casu cokonkha mfundo za Cikhilisitu.

Tyani osawela ku msonkhano wasu sondo ino kuti mukazionele mweka zatalaŵizhyana? Tikakulondeleni na manja aŵili. Misonkhano yasu ni yosalipilisha nipo ponkhala lini kuyendesha mbale ya zotwala.

• Ko misonkhano yasu yukonkha cisanzo cotyani?

• Kansi kupezekapo kwasu pa misonkhano Yacikhilisitu kuli na ubwino wanji?