Keno muphunzila Baibolo na wa Mboni za Yehova, niye kuti mukonzekelelatu phunzilo iliyonse. Kuti mupindule ngako, mukocita cimozi-mozi na misonkhano ya mpingo. Cofunika ngako kuti tikwanishe zamene izi ni kunkhala na ciyoŵelezi ciweme.

Sankhani malo yati mukokonzekelela na nthawi yake. Ko ni nthawi yanji yamusavutika kumvwa zamuŵelenga? Kansi ni m’mawa ngako mukaliyoyamba nchito olo usiku pavuli pakuti ŵana ŵanu alala? Nangu kuti mukwanisha lini kuŵelenga nthawi itali, sankhani nthawi itontho yamungakwanishe, nipo musalole ciliconse kukusokonezani. Nkhalani pa malo paliye congo, nipo zimyani wailesi, TV na foni kuti visakusokonezeni. Kupemphela mukaliyoyamba kukonzekela kukuyavyeni kucefya nkhaŵa za siku yamene iyo kuti malingililo ŵanu onse ankhale pa Malizu a Mulungu.—Afilipi 4:6, 7.

Congani mfundo, nipo konzekelani kuyoyankhapo. Coyamba, pezani cithunzi ca nkhani yonse. Lingililani mutu wa nkhani keno capitala, onani mwayukatizhyilana mitu itontho-itontho na mutu ukulu wa nkhani, nipo onani vithunzi-thunzi na makonsho owelelamo amene oonesha mfundo zikulu-zikulu za nkhani yamene iyo. Pavuli pake ŵelengani ndime iliyonse nopeza yankho ya konsho yake. Ŵelengani malembo onse osakatiwa malizu, nipo onani mwayokatizhyilana na nkhani yamene iyo. (Machitidwe 17:11) Mukapeza yankho, congani malizu oŵelengeka ofunika, keno kaciganizo m’ndime kamene kangakukumbusheni yankho. Pa misonkhano, mungapanamike kwanja noyankha m’malizu ŵanu-ŵanu.

Keno mukonzekela zatuphunzila sondo iliyonse pa misonkhano, muziŵe mfundo zinyinji za m’Baibolo.—Mateyu 13:51, 52.

• Kansi muwamila kunkhala na ciyoŵelezi cotyani kuti mukokonzekela misonkhano?

• Ko mungakonzekele tyani kuti mukayankhepo pa misonkhano?