Pa nthawi yakuti wasala patontho kufwa, Yesu elaŵila kuti: “Uthenga uweme uyu wa Ufumu ukalalikiwe pacalo conse capansi kwamene kuli ŵanthu, kuti unkhale umboni ku mitundu yonse, pavuli pake masilizhyilo akafwike.” (Mateyu 24:14) Kansi nchito yamene iyi yolalikila pacalo conse sembe yekwanishika tyani? Sembe yekwanishika mwa kukonkha cisanzo cecisiya Yesu peenze pacalo.—Luka 8:1.

Tufwikila ŵanthu m’mang’anda mwao. Yesu ephunzisa ophunzila ŵake kulalikila uthenga uweme ku ng’anda na ng’anda. (Mateyu 10:11-13; Machitidwe 5:42; 20:20) Alaliki a m’vyaka 100 voyambilila amene ao epasiwa magawo olalikilamo. (Mateyu 10:5, 6; 2 Akorinto 10:13) Nangu masiku ŵano, nchito yasu yolalikila yucitika mwadongosolo, nipo mpingo uliwonse unkhala na gawo. Zamene izi zutiyavya kumvwila lamulo ya Yesu yakuti “tilalikile ku ŵanthu notwala umboni wokwanila.”—Machitidwe 10:42.

Tuyesa-yesa kufwikila ŵanthu kulikonse kwaangapezeke. Yesu etwala soti cisanzo mwa kulalikila ŵanthu ku malo osiyana-siyana, monga m’mbali mwa m’mana olo pa cisime. (Maliko 4:1; Yohane 4:5-15) Nase tulaŵizhyana na ŵanthu nkhani za m’Baibolo kulikonse kwatingaŵapeze—m’miseu, m’malo a malonda, m’mapaki olo pa foni. Tikankhala na mpata uweme, tulalikila soti ŵanthu ŵatunkhala nao pafupi, ayasu a kunchito, ayasu a kusukulu na acibanja. Njila zonse izi zayavya kuti ŵanthu mamiliyoni pacalo conse amvwe “uthenga uweme wa cipulumuso.”—Salimo 96:2.

Mwa ni ŵani wamungafune kuuzhyako uthenga uweme wa Ufumu wa Mulungu na zati ukaŵacitile kusogolo? Osaŵatana uthenga wa ciyembekezo wamene uyu. Ŵauzhyeni kamangu!

• Kansi ni “uthenga uweme” wotyani watuwamila kulalikila?

• Kansi a Mboni za Yehova okonkha tyani cisanzo ca Yesu polalikila?