Ŵanthu anyinji olingilila kuti zina yakuti Mboni za Yehova ni zina ya cipembezo calombapano. Koma vyaka vopitilila 2,700 vapita, atumiki a Mulungu woona enzoitiwa kuti “mboni” zake. (Yesaya 43:10-12) Caka ca 1931cikaliyofwika, tenzoitiwa kuti Ophunzila Baibolo. Ndaŵanji tesankha zina yakuti Mboni za Yehova?

Zina yamene iyi yulengeza zina ya Mulungu wasu. M’mipukutu yakale ya Baibolo, zina ya Mulungu yakuti Yehova, yupezeka nthawi masauzande anyinji. Mu Mabaibolo anyinji zina yamene iyi aifumyamo noikamo mazina audindo n’nga Asikulu olo Mulungu. Koma Mulungu wacendi euzhya Mose kuti zina yake ni Yehova. Yove eciti: “Yamene iyi niye zina yangu mpaka kale-kale.” (Ekisodo 3:15) Apa, yove ezisiyanisha na milungu yonse yawenye. Tumekela kuziŵika na zina ituŵa ya Mulungu.

Zina yamene iyi yufotokoza nchito yasu. Ŵanthu anyinji akale, kuyambila na munthu wolungama Abele, ecitila umboni za cikhulupililo cao mwa Yehova. M’kuluta kwa nthawi, Nowa, Abulahamu, Sara, Mose, Davide na ayakine enkhala m’gulu ikulu yamene iyi ya “mkumbi wa mboni.” (Aheberi 11:4–12:1) Mwacisanzo, munthu muyambine angankhale mboni m’khoti pa mlandu wa muyake wamene aliyolakwe. Nase tingasiye lini kuuzhya ayakine cendi cokhuza Mulungu.

Tukonkha cisanzo ca Yesu. Baibolo yulaŵila kuti Yesu ni “mboni yokhulupilika koma soti yacendi.” (Chivumbulutso 3:14) Yesu elaŵila yeka kuti ‘eziŵikisha zina ya Mulungu’ nipo ‘ecitila umboni cendi’ conena za Mulungu. (Yohane 17:26; 18:37) Tetyo okonkha ŵene-ŵene a Yesu owamila kulengeza zina ya Yehova noiziŵikisha ku ŵanthu. Izi niye zakulimbikila kucita a Mboni za Yehova.

• Ndaŵanji Ophunzila Baibolo esankha zina yakuti Mboni za Yehova?

• Ko Yehova wankhala na mboni pacalo capansi kuyambila lini?

• Kansi Mboni ikulu ya Yehova ni ŵani?