Caka ciliconse, gulu yasu yusindikizhya ma Baibolo na mabuku mamiliyoni anyinji noŵayaŵila cosalipilisha. Tumanga nosamalila Ng’anda za Ufumu na maofesi a msambo. Tucilikiza akwasu na azilongosi anyinji amene otumikila pa Beteli na amishonale, nipo tutwala thandizo pakacitika soka. Tetyo mungakonshe kuti, ‘Kansi ndalama zocitila nchito zonse izi zufumila kuni?’

Tutwala lini cakhumi, kulipilisha mtulo olo kuyendesha mbale ya zotwala. Nchito yasu yolalikila yufuna ndalama zinyinji, koma tusenga lini ndalama. Vyaka vopitilila 100 vapita, magazini yaciŵili ya Nsanja ya Olonda yelaŵila kuti tukhulupilila kuti Yehova niye otiyavya na kuti “tikasenge lini thandizo ku ŵanthu”—nipo tiliyesengepo!—Mateyu 10:8.

Nchito yasu yucilikiziwa na zotwala zolifunila. Ŵanthu anyinji oyamikila nchito yasu yophunzisa Baibolo nipo otwala ndalama kuyavya pa nchito yolalikila. Nipo Mboni za Yehova mofumila pansi pa mtima zuseŵenzesha nthawi yao, mphamvu zao, ndalama zao na zinthu ziyakine pocita cifunilo ca Mulungu pacalo conse. (1 Mbiri 29:9) Pa Ng’anda ya Ufumu na pa misonkhano yadela na yacigawo ponkhala mabokosi ya zotwala kuti ofuna aponyemo. Nthawi zinyinji zotwala zatulondela zufumila ku ŵanthu amene aliye zinyinji, n’nga munakazi wamasiye wosauka weciyamikila Yesu cifukwa coponya tumakhobili tuŵili moponyamo zotwala. (Luka 21:1-4) Tetyo aliyense ‘angosunga kayakine pambali’ kuti atwale “mokatizhyana na mwawasimikizhyila mumtima mwake.”—1 Akorinto 16:2; 2 Akorinto 9:7.

Tili na cikhulupililo cakuti Yehova apitilizhye kusonkhezela mitima ya ŵanthu ofuna ‘kumulemekeza na zinthu zao zamtengo wapatali’ kuti acilikize nchito ya Ufumu, kuti cifunilo cake cicitike.—Miyambo 3:9.

• Kansi gulu yasu yusiyana tyani na vipembezo viyakine?

• Ko zotwala zolifunila zuseŵenza nchito yanji?