Molingana na zina yakuti Ng’anda ya Ufumu, ciphunziso cikulu ca m’Baibolo catuphunzila kwamene uko culaŵila za Ufumu wa Mulungu, yamene yenze mfundo ikulu ya ulaliki wa Yesu.—Luka 8:1.

Ni malo olambilila Mulungu. Nchito yolalikila uthenga uweme wa Ufumu yucitika kufumila ku malo amene aŵa. (Mateyu 24:14) Ng’anda za Ufumu zusiyana-siyana kukula kwake na kamangidwe kake, koma zunkhala lini zikulu olo zokongola mopitilila malile. Nipo Ng’anda za Ufumu zinyinji zuseŵenzeshewa na mipingo yopitilila pa umozi. M’vyaka vitontho vapita, tamanga Ng’anda za Ufumu masauzande anyinji (pa avaleji Ng’anda za Ufumu 5 pa siku) kuti tikwanishe kusamalila mipingo yamene yupakila-pakila. Kansi zamene izi zukwanishika tyani?—Mateyu 19:26.

Ndalama zomangila zufumila m’mipingo yosiyana-siyana. Zotwala zamene izi zutumizhyiwa ku ofesi ya msambo kuti ziseŵenzeshewe kumangila olo kukonza soti Ng’anda za Ufumu ku malo kwazufunikila.

Zumangiwa na anchito olitwala amene olipiliwa lini koma soti a zinkhalidwe zosiyana-siyana. M’vyalo vinyinji, Magulu Omanga Ng’anda za Ufumu ankhazikishiwa. Atumiki anchito yomanga na anchito olitwala oluta ku mipingo yosiyana-siyana nangu ku madela akutali m’calo cao, kuti akatangulile pa nchito yomanga Ng’anda za Ufumu. M’vyalo viyakine, Mboni zoyenelela zasankhiwa kuti zikoyanganila nchito yomanga na kukonza Ng’anda za Ufumu m’vigawo vecipasiwa. Nangu kuti akwasu na azilongosi amene ali na maluso osiyana-siyana ofumila mbali zosiyana-siyana, akwasu na azilongosi a mumpingo mwamene umo olitwala kuti ayavye pa nchito yomanga Ng’anda ya Ufumu. Nchito yamene iyi yukwanishika cifukwa ca mzimu wa Yehova na ŵanthu ŵake amene olitwala na mtima wonse.—Salimo 127:1; Akolose 3:23.

• Ndaŵa yanji malo yasu yolambilila yoitiwa kuti Ng’anda za Ufumu?

• Kansi tukwanisha tyani kumanga Ng’anda za Ufumu pacalo conse?