A banja ya Beteli otumikila m’madipatimenti osiyana-siyana, kusamalila nchito yolalikila m’calo cimozi olo m’vyalo voŵelengeka. Ayakine okata nchito yotembenuza, yosindikizhya magazini, yoika vikuto ku mabuku, nipo ayakine oseŵenzela kosungila mabuku, kopangila ma CD na mavidyo olo kusamalila nchito ziyakine zokhuza dela yao.

Komiti ya Msambo yuyanganila nchito. Bungwe Yolamulila yatwala udindo wosamalila ofesi ya msambo iliyonse m’manja mwa Komiti ya Msambo ya akulu oyenelela atatu olo opitililapo. Komiti ya Msambo yuziŵisha Bungwe Yolamulila za kuluta pasogolo kwa nchito koma soti mavuto alionse angawele m’dela yao. Malipoti amene aŵa oyavya Bungwe Yolamulila kuona nkhani zaangalembe m’zofalisa zasu na mfundo zaangaikemo m’nkhani za pa misonkhano ya mpingo na misonkhano ikulu-ikulu. Opanamila Bungwe Yolamulila otumizhyiwa nthawi na nthawi kuyoyendela maofesi a msambo kuti atwale malangizo ku Komiti ya Msambo okhuza mwangaseŵenzele nchito yao. (Miyambo 11:14) Ponkhala pulogilamu yapadela nipo woyendela msambo olaŵila nkhani yolimbikisha onse m’dela ya msambo yamene iyo.

Ocilikiza mipingo. Akwasu audindo ku ofesi ya msambo ovomelezhya kuti mipingo inkhazikishiwe. Oyanganila soti nchito ya apainiya, amishonale na oyanganila oyenda-yenda amene otumikila m’dela ya msambo yamene iyo. Okonza misonkhano ikulu-ikulu, oyanganila nchito yomanga Ng’anda za Ufumu nipo osimikizhyila kuti mabuku yotumizhyiwa ku mipingo. Nchito zonse zucitika ku ofesi ya msambo zuyavya kuti nchito yolalikila ikoyenda mwadongosolo.—1 Akorinto 14:33, 40.

• Kansi Makomiti a Msambo oyavya Bungwe Yolamulila m’njila zotyani?

• Ko ofesi ya msambo yusamalila nchito zotyani?