Malembo Acigiriki Acikhilisitu otiuzhya za Baranaba na mtumwi Paulo. Analume amene aŵa enzotumikila n’nga oyanganila oyenda-yenda, nipo enzoyendela mipingo. Ko n’cinji ceŵasonkhezela kucita zamene izi? Enzocitila nkhaŵa umoyo wauzimu wa akwao. Paulo elaŵila kuti yove enzofuna ‘kuwelela kuti akatandalile akwasu’ noona kuti ali tyani. Yove enze wokonzeka kuyenda makilomita anyinji kuti akaŵalimbikishe. (Machitidwe 15:36) Ici niye colinga ca oyanganila oyenda-yenda masiku ŵano.

Owela kuzotilimbikisha. Woyanganila dela oyendela mipingo pafupi-fupi 20, nipo osila sondo imo pa mpingo ulionse, kaŵili pacaka. Tulimbikishiwa ngako na akwasu amene aŵa na azinakazi ŵao, keno ni olungula. Oyanganila oyenda-yenda na azinakazi ŵao oyesa-yesa kuziŵana na aliyense, atontho-atontho pamo na akulu-akulu. Ove ofuna kulalikila pamo na seo noluta nase ku maphunzilo ŵasu a Baibolo. Oyanganila amene aŵa ocita maulwendo auciŵeta pamo na akulu, nipo olaŵila nkhani pa misonkhano ya mpingo na pa misonkhano ikulu-ikulu kuti atilimbikishe.—Machitidwe 15:35.

Oonesha cidwi pa aliyense. Oyanganila oyenda-yenda ofuna kuziŵa umoyo wauzimu wa mipingo yonse. Okumana na akulu na atumiki oyavya kuti aone mwamene mpingo walutila pasogolo noŵayavya mwaangakatile luweme nchito zao. Oyavya apainiya kuti apambane pa utumiki wao, nipo okonda kuziŵana na alomba na kumvwa mwakulutila pasogolo mwauzimu. Aliyense wa akwasu amene aŵa olitwala n’nga wanchito muyasu kuti ‘atiyavye.’ (2 Akorinto 8:23) Tuwamila kutolela cikhulupililo cao na kulitwala kwao kwa Mulungu.—Aheberi 13:7.

• Ndaŵanji oyanganila oyenda-yenda oyendela mipingo?

• Mwa otiyavya pa mbali zotyani akayendela mpingo?