Yesu Khilisitu euzhya okonkha ŵake kuti: “Oneshani kuwala kwanu pamenso pa ŵanthu, kuti aone nchito zanu ziweme na kuti alemekeze Ausuwanu akululu.” (Mateyu 5:16) Kuti ticite zamene izi, tuseŵenzesha zinthu zamakono, kuyangizhyilapo Intaneti. Webusaiti ya jw.org niye adilesi yasu yovomelezhyeka ya pa Intaneti, yamene ili na nkhani zokhuza zikhulupililo za Mboni za Yehova na nchito yao. Ko popezeka cinji?

Mayankho a m’Baibolo yakukonsha ŵanthu anyinji. Mungafwane mayankho a makonsho ofunika ngako yakukonsha ŵanthu. Pa makonsho amene ayo, makonsho 6 oyankhiwa m’kapepala kakuti Kodi Mufuna Kudziŵa Mayankho a Zoona pa Mafunso Aya? kamene kopezeka pa Intaneti m’vilaŵilo vopitilila pa 400. Mungapeze soti Baibulo la Dziko Latsopano m’vilaŵilo vopitilila pa 100 na mabuku ayakine oyavya kumvwishisha Baibolo, kuyangizhyilapo buku yakuti Zimene Baibo Imaphunzitsa m’Ceni-ceni koma soti magazini yalomba ya Nsanja ya Mlonda na Galamukani! Mungaŵelenge olo kumvwishila zofalisa zamene izi pa Intaneti keno kuzicita dawunilodi mumpangidwe womvwishila olo woŵelenga pa PDF olo pa EPUB. Mungasindikizhye nangu mapeji oŵelengeka kuti mupase munthu wacidwi m’cilaŵilo cake. Pali soti mavidyo a zofalisa m’vilaŵilo va manja vosiyana-siyana. Mungacite dawunilodi masewelo a m’Baibolo a malizu tyala, masewelo ayakine a m’Baibolo na nyimbo zosangalasha zomvwishila pa nthawi iliyonse yamufuna.

Nkhani zacendi zokhuza Mboni za Yehova. Pa Webusaiti yamene iyi oikapo nkhani zalomba na mavidyo zoonesha mwayuyendela nchito yasu pacalo conse, zinthu zucitikila Mboni za Yehova na nchito yasu yotwala thandizo pakacitika soka. Mungapeze soti ciziŵiso cokhuza misonkhano yati icitike kusogolo na maadilesi ya maofesi a msambo.

Mwa kuseŵenzesha njila yamene iyi, tuwalisha cendi ku madela akutali pacalo capansi. Ŵanthu a m’madela osiyana-siyana, kuyangizhyilapo a ku Antarctica opindula. Pemphelo yasu ni yakuti “malizu a Yehova apitilizhye kufalikila mofulumila” pacalo conse capansi kuti Mulungu alemekezeke.—2 Atesalonika 3:1.

• Kansi Webusaiti ya jw.org yuyavya tyani ŵanthu anyinji kuphunzila Baibolo?

• Ko muli na nkhani iliyonse yamufuna kuona pa Webusaiti?