Akwasu na Azilongosi Okondeka:

Kukonda Mulungu na ŵanthu kutisonkhezela kumvwila lamulo yakuti “nkhoyani mukaphunzise ŵanthu a mitundu yonse kuti ankhale ophunzila ŵangu noŵabatiza.” (Mat. 28:​19, 20; Mko. 12:​28-31) Cikondi camene ciliye dyela ni camphamvu ngako. Cikondi ici cutiyavya kufwika pa mtima ŵanthu amene ali na “maganizo oyenelela amene angaŵayavye kuyopeza moyo wosasila.”—Mac. 13:48.

M’nthawi zakuvuli, tenzoika ngako maganizo pa kuseŵenzesha visanzo va ulaliki noyaŵila zofalisa. Koma lomba tufuna kukulisha luso yolaŵizhyana na ŵanthu. Tufuna kuonesha kuti tukonda ŵanthu mwa kulaŵizhyana nao nkhani zamene zuŵacitisha cidwi. Izi zutanthauza kuti tufunika kunkhala okonzeka kucinja noganizila mosamala zinthu zamene zingaŵafwike pa mtima. Kansi kabuku kano katiyavye tyani kucita izi?

Kabuku kano kali na mitu 12 yamene yutiphunzisa minkhalidwe yatufunika kukulisha kuti tikwanishe kukonda ŵanthu nopanga ophunzila. Mutu ulionse ni wozikiwa pa nkhani ya m’Baibo yamene yuonesha mwamene Yesu olo mlaliki muyakine wa m’vyaka 100 voyambilila, eoneshela nkhalidwe iyakine mu ulaliki. Colinga cake ni kuseŵenzesha lini visanzo va ulaliki, koma kusakila njila zatingaoneshelemo kuti tukonda ŵanthu. Olo kuti nkhalidwe iliyonse ni yofunika pa mbali zonse za utumiki wasu, tione mwamene nkhalidwe iliyonse ingankhalile yofunikila makamaka poyambisha makambisilano, pocita maulwendo owelelako olo posogoza maphunzilo.

Pamuphunzila mutu ulionse, mukoganizila mosamala mwamungaoneshele nkhalidwe yamene iyo polaŵizhyana na ŵanthu ku malo kwamunkhala. Yesayesani kukulisha cikondi canu pa Yehova na ŵanthu. Kupambana njila iyakine iliyonse, cikondi ici cikuyavyeni kukwanilisha colinga canu copanga ophunzila.

Tuyamikila ngako mwai woseŵenzela pamozi na mweo. (Zef. 3:9) Lekani kuti Yehova akudaliseni cifukwa copitilizhya kukonda ŵanthu nopanga ophunzila!