KUCITA ULWENDO WOWELELAKO
PHUNZILO 7
Mukolimbikila
Mfundo: “Epitilizhya mwakhama kuphunzisa nolengeza uthenga uweme.”—Mac. 5:42.
Zecicita Paulo
1. Onelelani VIDYO, olo ŵelengani Machitidwe 19:8-10. Pavuli pake, yankhani makonsho aŵa:
Kansi Tingaphunzilenji Kufumila Kuli Paulo?
2. Tufunikila nthawi na khama kuti tikwanishe kupanga maulwendo owelelako okata mtima noyambisha maphunzilo a Baibo.
Tolelani Cisanzo ca Paulo
3. Mukonkhala ofunishisha kuwelelako kuli munthu pa nthawi yakuona yove kuti ni yoyenela. Zikonsheni kuti: ‘Kansi ni pa malo olo nthawi yotyani paningalaŵizhyane naye? Kansi ni pa malo olo nthawi yotyani paangakonde yove kuti nilaŵizhyane naye?’ Mukonkhala okonzeka kuwelelako olo pa nthawi yamuona mweo kuti ni iweme lini.
4. Mukopangana nthawi na malo. Kosilizhyila kwa makambisilano alionse, mukoyesayesa kupanganilatu nthawi pati mukalaŵizhyane soti. Ndipo mukosunga pangano.
5. Mukopitilizhya kunkhala na ciyembekezo. Mukopewa kufulumila kuganiza kuti ngati munthu opezekapezeka lini pa ng’anda olo onkhala wotangwanika nthawi zinyinji, niye kuti aliye cidwi. (1 Akor. 13:4, 7) M’malo mwake, mukoyesayesa kulimbikila kuwelelako, koma pa nthawi imozimozi mukoseŵenzesha bwino nthawi yanu.—1 Akor. 9:26.
