Kalata Yofumila ku Bungwe Yolamulila
‘Nimwe oyenelela kunkhala aphunzisi’ (Aheb. 5:12) Ganizilani izi! Yehova wamene ni mphunzisi waluso m’cilengedwe conse otisenga kuti tikophunzisa ayakine zokhuza yove! Udindo uliwonse wophunzisa cendi cokhuza Yehova, kaya ni m’banja, mu mpingo olo mu utumiki ni wamtengo wapatali ndipo ni wosapepuka. Kansi tingaukwanilishe tyani?
Tingapeze yankho m’malizu a mtumwi Paulo yecilembela Timoteyo akuti: ‘Pitilizhya kunkhala wozitwala poŵelenga pagulu ya ŵanthu, poŵadandaulila, na poŵaphunzisa.’ Eyangizhyilapo kuti: ‘Ukacita tetyo uzipulumuse weka koma soti ŵanthu okumvwishila’ (1 Tim. 4:13, 16) Muli na uthenga wopulumusa moyo wakuti muuzhyeko ayakine. Tetyo mufunika kukulisha luso yoŵelenga nophunzisa. Kabuku kano kakonzewa kuti kakuyavyeni kucita zamene izi. Onani zili m’kabuku kano:
Pa peji iliyonse pali lemba yamene yufotokoza mfundo ya m’Baibolo yamene yukatizhyana na phunzilo olo cisanzo kulingana na phunzilo yakuseŵenzelapo munthu
Yehova ni ‘Mlangizi Mkulu.’ (Yes 30:20) Kabuku kano kakuyavyeni kukulisha luso yanu yoŵelenga nophunzisa. Osaluŵa kuti Yehova niye Cinyina ca uthenga watulalikila ndipo yove niye soti oita ŵanthu kuti awele kuli yove. (Yohane 6:44) Tetyo, nthawi zonse tikosenga mzimu wake utuŵa noseŵenzesha Malizu ŵake. M’malo mofuna kutamandiwa, mukoyavya ŵanthu kutamanda Yehova nokulisha cikondi cao pa yove.
Mwapasiwa mwai wophunzisa uthenga wofunika ngako ku ŵanthu. Tili na cidalilo cakuti mukwanishe nchito yamene iyi ngati ‘mudalila mphamvu yakutwala Mulungu’—1 Pet. 4:11.
Nise aphunzisi ayanu,
Bungwe Yolamulila ya Mboni za Yehova
